“TheDiplomat” сайтад Орос, Украины хоорон дахь дайныг зогсоох яриа хэлэлцээнд Монгол Улс чухал байр суурьтай гэх утгатай нийтлэл гарчээ. Тус нийтлэлийн зарим агуулгыг тоймлон хүргэж байна. Орос, Украины хоорон дахь дайн хэрхэн, хэзээ дуусахыг хэн ч мэдэхгүй. Гэхдээ бидний мэдэж байгаа ганц зүйл бол дайн энхийн хэлэлцээгээр л дуусгавар болно. Тэр цаг ирэхэд Монгол Улс Орос-Украины хоорондын яриа хэлэлцээнд онцгой байр суурьтай байна. Ямар ч өндөр эрсдэлтэй хэлэлцээ амжилттай болохын тулд аль аль талдаа таатай, аюулгүй газар явагдах ёстой. Хойд Солонгосын удирдагч Ким Жөн Ун, АНУ-ын Ерөнхийлөгч Дональд Трамп нарын дээд хэмжээний уулзалт Сингапур, Вьетнамд болж байсан. Одоогийн байдлаар Украин, Орос хоёрын хооронд энхийн хэлэлцээ хийхэд таатай улс орон бараг байхгүй.
Монгол бол Өмнөд Солонгосоос Украин хүртэлх Евразийн орон зай дахь цорын ганц ардчилсан орон юм. Монгол Улс барууны орнуудтай дипломат болон цэргийн нягт харилцаатай байсан. Дэлхий дээрх хамгийн өндөр дарангуйлалтай Хятад, Орос гэх хоёр их гүрний дунд орших "ардчиллын баян бүрд” болохын хувьд монголчууд украинуудын зовлон зүдгүүр, хүсэл тэмүүллийг хэнээс ч илүү ойлгоно.
Монгол Улсын эрчим хүчний 90 хувь нь ОХУ-аас хамааралтай. Украины асуудлаарх НҮБ-ын санал хураалтад Монгол түдгэлзсэн санал өгсөн. Мөн Монгол Улс ОХУ-ын эсрэг ямар нэгэн хориг арга хэмжээ аваагүй. Монгол Улс дайн эхэлснээс хойш олон мянган оросуудыг эх орондоо хүлээн авсаар байгаа юм. Монголд ирж байгаа орос хүн бүр Украинтай байлдахыг хүсээгүй, төрийн бодлогоо эсэргүүйцэж буй. Тэгэхээр эх орноосоо дүрвэж буй оросуудыг хүлээн авч байгаа нь дайныг зогсооход Монгол Улсын оруулж буй хувь нэмэр юм.
Түүнчлэн, гадаадад суралцсан Монголын дөрвөн Ерөнхийлөгчийн хоёр нь Орост, хоёр нь баруун Украинд боловсрол эзэмшсэн байна. Украины Ерөнхийлөгч Володимир Зеленский өөрөө бага насандаа гурван жил Монголд амьдарсан. Түүний аав нь Монголын томоохон зэсийн уурхай болох Эрдэнэт үйлдвэрийг хөгжүүлэхэд чухал үүрэг гүйцэтгэсэн. Монгол Улсын нээлттэй гадаад бодлого, хоёр талын энхийн хэлэлцээг зохион байгуулахад хамгийн тохиромжтой газар юм.
Дэлхий нийтийг хамарсан цар тахлын өмнө Япон, Хойд Солонгосын тагнуулын ажилтнууд Монголд нууц уулзалт хийсэн. Энэ бол олон нийтэд мэдэгдэж байгаа хэлэлцээрүүдийн зөвхөн нэг нь юм. Мөн Монгол Улс 2018 онд Ким-Трампын дээд хэмжээний уулзалтыг зохион байгуулах боломжтой орнуудын нэгээр нэрлэгдэж байсан. Монголын газарзүйн байршил нь өөрөө Оросын эсрэг дайсагналцахгүй байхыг шаарддаг. Гэвч ардчиллын үзэл баримтлал, итгэл үнэмшил нь Оросын Украинд зарласан дайныг буруутгахыг шаарддаг. Монголчууд Украины дайныг аль болох хурдан дуусгахыг хүсэж байна. Орос-Украины хэлэлцээг зохион байгуулах нь энх тайвныг тогтооход хувь нэмрээ оруулах арга зам байх болно. Энэ нь дэлхийн дэг журмыг сахин хамгаалахад дэмжлэг үзүүлээд зогсохгүй Зеленскийн хүүхэд ахуй насаа өнгөрөөсөн "эх орондоо" буцаж ирэх боломжийг олгоно гэж найдаж байна.
