XXVII жарны үзэсгэлэн болгогч хэмээх усан туулай жилийн өнгө, төлөв байдал ямар байх талаар Хамба лам З.Санждорж танилцууллаа.  

Тэрээр “Жилийн ерөнхий төлөв нь ард түмэн өлсөх цангах зовлонгүй, өег цатгалан, элдэв халдварт өвчингүй, бие махбод зовлонгүй, сэтгэл амар амгалан сайн жил болно. Хаад ноёд буюу эрх баригчид хууль цаазаа ёсчлон сахиж чадвал түмэн олон ард иргэд аз жаргалтай баяр цэнгэлээр бялхаж, дэлгэр сайхан жил гарах ажээ.  

Байгаль, цаг уурын хувьд жилийн хаврын урь хоёрдугаар сарын 4-нд өнгөрсөн. Хаврын урь орсон өдрөөр тухайн жилийн цаг уурын байдлыг шинждэг заншилтай. Энэ өдрийн шинж байдлаар нь тодорхойлбол тэнгэр торойх үүлгүй, тунгалаг цэлмэг, дулаан байсан учир түмэн бодис хөвөрч, цас мөс эрт хайлна, хур тунадас цагтаа бууна, гал усны аюулгүй, зундаа нийт нутгаар өвсний гарц сайн дэлгэр сайхан болно. Намар нь үр тариа ургац арвин, нарлаг тавтай байх болно. Өвөл нь цас багатай, өнөтэй байна.  

Нийт хүн ардын хувьд өндөр настай хүмүүст ээлтэй, зөөлөн. Идэр залууст ердийн хэвийн. Нялхаст хатуу, ширүүн байх магадлалтай. 

Нийгэм, улс төрийн хувьд зөрчил маргаан ихтэй. Залуусын идэвх сайжирна. Улс төрийн тэмцэл хурцадмал, сөрөг хүчний үйл ажиллагаа идэвхжинэ, төрийн хууль чангарч Үндсэн хуульд өөрчлөлт орох магадлалтай. Усан туулай жилд түүхэн үйл явдал давтагдах шинжтэй байдаг” гэлээ.