УИХ-ын гишүүн, Монгол-Энэтхэгийн парламентын бүлгийн дарга Ж.Чинбүрэн БНЭУ-аас Монгол Улсад суугаа Элчин сайд Атул Малхари Готсурветэй уулзаж, хоёр улсын хамтын ажиллагааны томоохон төслүүдийн хэрэгжилт болон цаашдын боломжийн талаар санал солилцжээ.

Уулзалтын үеэр Ж.Чинбүрэн газрын тос боловсруулах үйлдвэрийн бүтээн байгуулалт амжилттай үргэлжилж байгааг онцлоод, төслийг ашиглалтад оруулах ажлыг эрчимжүүлэх шаардлагатайг дурдсан байна. Мөн парламент хоорондын харилцаагаар дамжуулан стратегийн түншлэлийг бодит төсөл, харилцан ашигтай худалдаагаар баяжуулах нь чухал гэдгийг тэмдэглэжээ.

Элчин сайд Атул Малхари Готсурве Энэтхэгийн Засгийн газрын дэмжлэгтэйгээр хэрэгжүүлж буй гурван томоохон төслийн талаар мэдээлэл өгсөн байна. Үүнд 1.7 тэрбум ам.долларын хөнгөлөлттэй зээлээр санхүүжүүлж буй газрын тос боловсруулах үйлдвэр, Монгол-Энэтхэгийн найрамдлын ерөнхий боловсролын сургууль, Атал Бихари Важпайн Мэдээллийн технологи, харилцаа холбоо, аутсорсингийн төв багтаж байна. Түүнчлэн хоёр улсын хооронд шууд нислэг эхэлснийг онцолжээ.

Мөн Энэтхэгийн тал Монголын газрын ховор элементийн салбарт хамтран ажиллах, нүүрс худалдан авах сонирхолтой байгаагаа илэрхийлсэн байна. Цаашид эрүүл мэндийн салбарын хамтын ажиллагааг өргөжүүлэх, мэдээллийн технологи, тэр дундаа хиймэл оюун ухааны чиглэлээр Энэтхэгийн туршлага, боломжийг ашиглах асуудлыг хэлэлцжээ.