Монголбанкны Мөнгөний бодлогын хорооноос гаргасан макро зохистой бодлогын шийдвэрийг өнөөдөр танилцууллаа. Эдийн засгийн нөхцөл байдалтай холбоотойгоор зээлээ төлөхөд хүндрэлтэй болсон иргэд зээлийнхээ нийт хугацааг 48 сар хүртэл сунгаж болох бодлогын шийдвэр гаргажээ.

Энэ талаар Монголбанкны ерөнхийлөгч С.Наранцогт: Санхүүгийн хүндрэлд орсон иргэд зээлийнхээ нийт хугацааг 48 сар хүртэл уртасгаж, сарын төлбөрөө бууруулах боломжтой болж байна. Үнийн өсөлт болон бусад шалтгаанаар олон айл өрхийн бодит орлого буурч, цалингийн болон малчны зээлээ төлөхөд хүндрэлтэй болсон иргэдийн тоо нэмэгдэж байна. Тухайлбал, өр, орлогын харьцааны хязгаарлалтад хамаарах хэрэглээний зээлийн чанаргүй зээлийн хувь 2026 оны есдүгээр сард 9.1 хувьд хүрч, өмнөх оныхоос 2.7 нэгж хувиар өссөн байна.

Энэ нь олон банк, санхүүгийн байгууллагаас зэрэг зээл авсан зарим иргэдэд дарамтыг улам нэмэгдүүлсэн нөхцөл байдалд байна. Өнөөдрийг хүртэл ийм хэрэглэгчтэйгээ банк тохирч, хугацааг сунгах боломж хаалттай байсан. Учир нь шинээр зээл олгоход мөрдөгддөг өр, орлогын харьцаа болон хугацааны хязгаарлалт нь зээлийн бүтцийг өөрчлөхөд ялгаагүй үйлчилж байсан. Мөнгөний бодлогын хороо энэ нөхцөл байдлыг авч хэлэлцээд цалин, малчны, авто машины зээл зэрэг өр, орлогын харьцааны хязгаарлалтад хамаарах хэрэглээний зээлд нэмэлт зээл олгохгүйгээр бүтцийн өөрчлөлт хийх тохиолдолд зээлийн нийт хугацааг 48 сар хүртэл сунгаж болох шийдвэр гаргасан. Тухайн зээлд өр, орлогын харьцаа үйлчлэхгүй гэсэн үг. Гэхдээ хугацаа уртсахыг дагаад нийт төлөх хүүгийн дүн нэмэгдэнэ гэдгийг анхааруулъя. Гол нь зээлээ төлөхөд бодитой хүндрэлд орсон иргэдэд чиглэсэн шийдвэр юм. Бүтцийн өөрчлөлт автоматаар хэрэгжихгүй, иргэд зээл авсан банкиндаа хүсэлт гаргах ёстой. Банк иргэний санхүүгийн байдлыг журмынхаа дагуу үнэлж, бүтцийн өөрчлөлт хийх эсэхээ шийднэ. Шаардлагатай бол бүтцийн өөрчлөлтийг нэгээс олон удаа хийж болно. Гэхдээ нийт хугацаа 48 сараас хэтрэхгүй байх ёстой. Энэ шийдвэр өнөөдөр албажаад маргаашаас банкууд дээр хэрэгжинэ. Бүтцийн өөрчлөлт хийхдээ банкууд хүүг өөрчлөхгүй, нэмэлт зээл олгохгүй. Зөвхөн одоо байгаа зээлийн төлбөрийн хуваарийг иргэдийн орлогод нийцүүлж байна гэж ойлгох ёстой. Харин шинээр олгох зээлд өр, орлогын харьцааны 45 хувийн хязгаар хэвээрээ мөрдөгдөнө гэдгийг сануулъя гэлээ.