БНХАУ-ын Коммунист намын Төв хорооны тавдугаар бүгд хурал дөрвөн өдрийн турш Бээжин хотод хаалттай хэлбэрээр үргэлжилж, пүрэв гарагт өндөрлөлөө. Хурлын үеэр намын 33 гишүүнийг намаас хөөсөн бөгөөд энэ удаагийн хуралд оролцогчдын тоо түүхэн доод хэмжээнд хүрчээ.

Төв хорооны тавдугаар бүгд хуралд 279 гишүүн оролцсон нь 2025 оны аравдугаар сард болсон дөрөвдүгээр хурлын 315, 2024 оны долоодугаар сард болсон гуравдугаар хурлын 364 оролцогчоос эрс цөөн үзүүлэлт юм. Энэ нь Ши Жиньпин 2012 онд удирдагч болсноос хойш Төв хорооны бүгд хуралд оролцогчдын тоо 300-аас доош буусан анхны тохиолдол болж байна.

Хурлын үеэр эдийн засгийн шинэчлэл, нийгмийн хөгжлөөс илүүтэй намын сахилга бат, авлигатай тэмцэх асуудлыг голлон хэлэлцжээ.

Хурлын төгсгөлд гаргасан албан мэдэгдэлд намаас хөөгдсөн 33 гишүүний 16 нь цэргийн албан тушаалтан байсныг дурдсан байна. Тэднийг яг ямар хэрэгт буруутгаж байгаа нь тодорхойгүй бөгөөд албан ёсны тайлбарт “сахилга бат, хууль эрх зүйн ноцтой зөрчил” гаргасан гэжээ.

Ши Жиньпин 2012 онд засгийн эрхэнд гарснаасаа хойш авлигатай тэмцэхийг удирдлагынхаа гол чиглэл болгож, авлигыг Коммунист намд учирч буй хамгийн том аюул хэмээн тодорхойлж ирсэн. Гэвч шинжээчид энэхүү кампанит ажил нь зөвхөн авлигыг бууруулах бус, Ши Жиньпиний эрх мэдлийг бэхжүүлэх, нам доторх үнэнч байдлыг хянах хэрэгсэл болж байгааг онцолжээ.