Apple компани мэдрэгчтэй дэлгэцтэй анхны зөөврийн компьютер болох MacBook Pro загвараа аравдугаар сарын 28-нд танилцууллаа. Шинэ загвар арваннэгдүгээр сарын 6-наас худалдаанд гарах бөгөөд 14 болон 16 инчийн сонголттой юм.

Шинэ MacBook Pro нь M5 Pro болон M5 Max чипээр тоноглогдсон бөгөөд 14 инчийн загварын эхлэх үнэ 2,899 ам.доллар, 16 инчийнх 3,399 ам.доллар байна.

Apple компани мэдрэгчтэй дэлгэц нь ялангуяа дизайнер, хөгжүүлэгч, хөгжимчид зэрэг мэргэжлийн хэрэглэгчдэд илүү тохиромжтой гэж үзэж байна. Тухайлбал, хэрэглэгчид танилцуулгын слайдуудыг чирж зөөх, график зураг зурах, виртуал хөгжмийн зэмсэг тоглох боломжтой. Мөн хөгжүүлэгчид өөрсдийн бүтээсэн аппликейшн хэрхэн ажиллаж байгааг компьютер дээрээ шууд турших боломжтой аж.

Тус компанийн мэдээлснээр, дэлгэцийн мэдрэгчийг нэмэлт давхарга болгон дээр нь байрлуулах бус, дэлгэцийн бүтцэд шууд нэгтгэсэн нь шудрах, гүйлгэх үйлдлийн хариу үйлдлийн саатлыг багасгах давуу талтай. Шинэ загварт iPhone-оос танил болсон Dynamic Island функц болон уран бүтээлчдэд зориулсан өнгөний дүрслэлийн нэмэлт боломжуудыг багтаажээ.

Мэдрэгчтэй дэлгэцтэй зөөврийн компьютер зах зээлд арав гаруй жилийн өмнөөс бий болсон. Microsoft компани 2012 онд Windows 8 үйлдлийн системээ танилцуулахдаа компьютерын хэрэглээг гар утас, таблеттай төстэй болгохыг зорьсон ч шинэ интерфэйс нь хэрэглэгчдэд ойлгомжгүй, ашиглахад төвөгтэй гэсэн шүүмжлэлд өртөж байв.