АНУ-ын Ерөнхийлөгч Дональд Трампын ууган хүү Дональд Трамп Жуниор энэ зун Монголын баруун хэсэгт байрлах алслагдсан анчдын баазад ОХУ-ын Ерөнхийлөгч Владимир Путинтай ойр харилцаатай гэгддэг бизнесмэн Умар Кремлёвтэй хоёр өдөр хамт байсан талаар Financial Times сонин мягмар гарагт мэдээлжээ.

Тус сонины мэдээлснээр, Трамп Жуниор Монголд зэрлэг ан амьтан агнах аялал хийхдээ АНУ-ын Нууц албаны хамгаалалттай явсан байна. Харин Олон улсын боксын холбооны (IBA) ерөнхийлөгч Умар Кремлёв Казахстаны боксын хэвлэлийн бага хуралд оролцсоныхоо дараа хувийн онгоцоор Улаанбаатарт ирж, улмаар Трамп Жуниорын байрлаж байсан ангийн баазад очжээ.

Financial Times уг мэдээллээ нислэгийн бүртгэл болон аялалд оролцсон орон нутгийн хөтөч нарын мэдүүлэгт үндэслэн нийтэлсэн байна. Аялалд оролцсон нэг хүний хэлснээр, Трамп Жуниор, Кремлёв нар хамтдаа гэрэл зураг авахуулахаас зайлсхийж байжээ.

Трамп Жуниорын Монгол Улс дахь ангийн аяллын зардлын тодорхой хэсгийг буяны дуудлага худалдаагаар санхүүжүүлсэн аж. Дуудлага худалдаанд оролцогчид ерөнхийлөгчийн хүүтэй хамт цаг өнгөрүүлэх боломжийн төлөө 140 мянган ам.доллар хүртэл төлсөн байна.