Монголын үндэсний бөхийн холбооны Ёс зүй, сахилга хариуцлагын зөвлөлөөс үндэсний бөхийн барилдааны үеэр ёс зүйн зөрчил гаргасан, барилдаанаа хаяж явсан бөхчүүдэд барилдах эрхийн хугацаатай хориг тавьжээ.Тодруулбал, тус зөвлөлийн 2026 оны есдүгээр сарын 25-ны өдрийн 14 дүгээр тогтоолоор Говь-Алтай аймгийн Цээл сумын харьяат, сумын харцага Р.Амгаланбаатарт бүх шатны барилдаанд оролцох эрхийг 2.8 жилээр хязгаарлах шийдвэр гаргасан байна. Түүнийг есдүгээр сарын 9-нд Цээл сумын баяр наадмын үеэр гаргасан үйлдлээрээ Монгол бөхийн ёс жудагт харшилж, үзэгч олон, жаяг дэгийн багийн гишүүдийг үл хүндэтгэсэн гэж үзжээ.Мөн Баянхонгор аймгийн Заг сумын харьяат, улсын начин Д.Цэрэнтогтоход бүх шатны барилдаанд оролцох эрхийг дөрвөн сарын хугацаагаар хориглосон байна. Тэрбээр долоодугаар сарын 26-нд Баянхонгор аймаг байгуулагдсаны 85 жилийн ойн баяр наадамд барилдах үеэрээ ёс зүйн зөрчил гаргасан гэж зөвлөл дүгнэжээ.Үүнээс гадна МҮБХ-ны Ёс зүй, сахилга хариуцлагын зөвлөлийн 2026 оны аравдугаар сарын 16-ны өдрийн 2 дугаар тогтоолоор улсын болон аймгийн цолтой хэд хэдэн бөхөд барилдах эрхийн хугацаатай хориг тавьсан байна.Тухайлбал, улсын заан Ц.Мягмарсүрэнг 24 сарын хугацаанд бүх шатны барилдаанд оролцуулахгүй байхаар шийдвэрлэжээ. Түүнийг Үндэсний их баяр наадмын хүчтэн бөхийн барилдаанд барилдаж байхдаа барилдаанаа дуусгалгүй хаясан гэж үзсэн байна.
