Хятад улс цоохор ирвэс хамгаалах ажлын үр дүнд тус улсын тоо толгойг 2013 оноос хойш хоёр дахин нэмэгдүүлж, 5000 орчимд хүргэсэн талаар мэдээллээ. Харин Монгол Улсад цоохор ирвэсийн тоо толгойг 2021 оны улсын хэмжээний судалгаагаар 953 гэж тоолсон бол 2026 онд Байгаль орчин, уур амьсгалын өөрчлөлтийн яамнаас 1200 орчим гэж мэдээлжээ. Гэвч дэд бүтцийн бүтээн байгуулалт, уул уурхай, мал сүргийн өсөлт зэрэг нь Монголын цоохор ирвэсийн амьдрах орчинд эрсдэл учруулсаар байна.

Хятадын Ойн аж ахуй, бэлчээрийн удирдах газрын мэдээлснээр тус улсын цоохор ирвэсийн тоо толгой хоёр дахин нэмэгдсэн ба амьдрах орчны нийт талбай 2.08 сая хавтгай дөрвөлжин километрт хүрчээ. Дэлхийн цоохор ирвэсийн тархац нутгийн 60 гаруй хувь нь Хятадын нутаг дэвсгэрт багтдаг аж.

Тус улс цоохор ирвэсийн амьдрах орчныг хамгаалах зорилгоор хоёр үндэсний цэцэрлэгт хүрээлэн, стратегийн ач холбогдол бүхий бүсүүдэд 78 тусгай хамгаалалттай газар байгуулжээ. Үүний зэрэгцээ 800 мянга гаруй хавтгай дөрвөлжин километр талбайг хатуу хамгаалалтад авсан нь ирвэсийн боломжит амьдрах орчны бараг 40 хувьтай тэнцэж байна.

Мөн өмнө нь цоохор ирвэс устаж үгүй болсон зарим бүс нутагт популяцыг сэргээх ажил хэрэгжүүлж, Хэлань уулын бүсэд байгальд нь дахин нутагшуулах хөтөлбөр эхлүүлжээ.