АНУ-ын Техас мужид SpaceX болон Tesla компаниуд хиймэл оюуны (AI) чип үйлдвэрлэх "Terafab" үйлдвэрийн эхний шатанд 16.8 тэрбум ам.долларын хөрөнгө оруулахаар болсноо зарлалаа.

Энэхүү үйлдвэр нь AI-ийн эрчимтэй өсөн нэмэгдэж буй тооцооллын хэрэгцээг хангах зорилготой бөгөөд бүрэн хэрэгжсэн тохиолдолд дэлхийн хамгийн том хагас дамжуулагчийн үйлдвэрлэлийн цогцолборуудын нэг болох юм.

Үйлдвэрийг Техас мужийн Граймс тойрогт барихаар сонгосон бөгөөд эхний шатанд дор хаяж 3,000 өндөр цалинтай ажлын байр бий болгохоор төлөвлөжээ. Төслийн нийт талбай ойролцоогоор 100 сая квадрат фут байх ба чип үйлдвэрлэл, савлагаа, туршилтыг нэг дор төвлөрүүлсэн нэгдсэн үйлдвэрлэлийн системтэйгээрээ онцлог аж.

AI-ийн өрсөлдөөн дараагийн шатанд шилжив

Сүүлийн жилүүдэд хиймэл оюуны хөгжлийг дагаад өндөр хүчин чадалтай чипийн эрэлт огцом өссөн. Nvidia зэрэг үйлдвэрлэгчдийн чипийг дэлхийн технологийн аваргууд өрсөлдөн худалдан авч байгаа энэ үед Илон Маскийн компаниуд шаардлагатай чипээ дотооддоо үйлдвэрлэх стратегийг сонгож байна.

Шинэ үйлдвэрээс үйлдвэрлэх чипүүдийг Tesla-ийн өөрөө жолооддог автомашин, Optimus хүн дүрст робот, мөн SpaceX-ийн хиймэл дагуулд суурилсан өгөгдлийн төвүүдэд ашиглахаар төлөвлөжээ.

Хөрөнгө оруулалт цаашид өсөх боломжтой

SpaceX-ийн мэдээлснээр энэ нь зөвхөн эхний шатны хөрөнгө оруулалт бөгөөд үйлдвэрийн бүрэн бүтээн байгуулалт хэрэгжвэл нийт хөрөнгө оруулалт 119 тэрбум ам.долларт хүрэх тооцоо гарсан байна.

Техасын захирагч Грег Эбботт уг төслийг мужийн технологийн салбарын хөгжилд томоохон түлхэц болно хэмээн үнэлсэн бол орон нутгийн зарим иргэд байгаль орчин, эрчим хүчний хэрэглээ болон дэд бүтцэд үзүүлэх нөлөөлөлд болгоомжлол илэрхийлжээ.

AI-ийн эрин үед технологийн компаниуд зөвхөн программ хангамж бус, чип үйлдвэрлэлийн нийлүүлэлтийн сүлжээг өөрсдийн хяналтад авах шинэ өрсөлдөөн эхэлснийг харуулж байна. Хэрэв төлөвлөгөө бүрэн хэрэгжвэл SpaceX, Tesla компаниуд AI-ийн дэд бүтцээ гаднын үйлдвэрлэгчдээс үлэмж хэмжээгээр хараат бус болгох боломжтой болох юм.