Олон улсын таеквондогийн холбоо “ITF”-ийн 60 жилийн ойн хүрээнд 11 дэх удаагийн Ази тивийн аварга шалгаруулах тэмцээн Монгол Улсын Ерөнхий сайдын ивээл дор зохион байгуулагдаж байна.

Олон улсын таеквондогийн Ази тивийн аварга шалгаруулах тэмцээн гуравтдахь өдрөө Буянт-Ухаа спорт ордонд үргэлжилж байгаа ба наймдугаар сарын 9-нд өндөрлөнө.

Хоёр жил тутамд шилдгүүдээ тодруулдаг тивийн тэмцээнд 32 орны 1283 тамирчин оролцож байна. Энэ удаагийн Азийн аварга өсвөр үе, насанд хүрэгчид, мастер ангилалаар тулаан, хөдөлгөөнт тоот дасгал, хатуу биет хугалах төрөл, онцгой чадвар, зохиомол тулаан зэрэг төрөлөөр явагдаж байна.

“Улаанбаатар 2026” тэмцээнийг гурван өдрийн дараах байдлаар Хойд Солонгосын баг 24 алт, 11 мөнгө, хоёр хүрэл, нийт 37 медальтайгаар тэргүүлсэн эхэлсэн бол Монгол Улсын баг 7 алт, 14 мөнгө, 16 хүрэл медальтайгаар удаалж байна. ОХУ 5 алт, 3 мөнгө, 6 хүрэлтэй, Камбож 1 алт, 5 мөнгө, 6 хүрэл медальтай эхний тавд бичигдэж байна.