АНУ, Ираны төлөөлөгчид Катарын нийслэл Доха хотод хоёр өдөр үргэлжилсэн шууд бус хэлэлцээгээ өндөрлүүлсэн ч урт хугацааны энхийн тохиролцоонд дорвитой ахиц гарсангүй. Хэлэлцээ голчлон Ормузын хоолойн усан тээврийг хэвийн сэргээх болон Ираны царцаасан хөрөнгийг чөлөөлөх асуудалд төвлөрсөн байна.
Катарын Гадаад хэргийн яамны мэдээлснээр, дараагийн уулзалт Ираны дээд удирдагч агсан Аятолла Али Хаменеигийн оршуулгын дараа болох бөгөөд Дохагийн хэлэлцээ зургадугаар сард байгуулсан дайныг зогсоох санамж бичгийн хэрэгжилтэд "эерэг ахиц" гаргасан гэжээ.
Харин АНУ-ын Ерөнхийлөгч Дональд Трамп Ираны цөмийн хөтөлбөрийг хязгаарлах асуудлаар ахиц гарч байгаа гэж мэдэгдсэн ч хэлэлцээний талаар мэдээлэлтэй эх сурвалжуудын хэлснээр энэ удаагийн уулзалтаар цөмийн асуудлыг огт хэлэлцээгүй байна. АНУ-ын Дэд ерөнхийлөгч Жэй Ди Вэнс уг асуудлыг дараагийн шатны хэлэлцээнд авч үзнэ гэж мэдэгджээ.
Хоёр улсын төлөөлөгчид Катар, Пакистаны зуучлагчидтай тус тусдаа уулзсан бөгөөд Ираны төлөөлөгчдийг ахалсан Гадаад хэргийн дэд сайд Казем Гарибабади хэлэлцээ өндөрлөснийг баталсан ч талууд санал зөрөлдөөнөө арилгаж чадсан эсэх талаар мэдээлээгүй байна.
Ормузын хоолойн нөхцөл байдал тодорхойгүй хэвээр
Түр хэлэлцээрийн дагуу дэлхийн газрын тос, шингэрүүлсэн байгалийн хийн худалдааны 20 орчим хувь дамждаг Ормузын хоолойгоор усан тээврийг сэргээхээр тохиролцсон ч нөхцөл байдал бүрэн тогтворжоогүй байна.
Ираны эх сурвалжуудын мэдээлснээр, Тегеран Ормузын хоолой дахь хяналтаа олон улсад хүлээн зөвшөөрүүлэхийг зорьж байгаа бөгөөд наймдугаар сарын дунд үеэс уг хоолойгоор зорчих усан онгоцноос төлбөр авч эхлэхээр төлөвлөжээ.
Трамп мөн Ирантай дахин бүрэн хэмжээний дайн гарах магадлал буурсан гэж үзэж байгаагаа илэрхийлсэн байна. Түүний мэдэгдлийн дараа дэлхийн зах зээл дээр газрын тосны үнэ сүүлийн дөрвөн сарын хамгийн доод түвшинд хүрч буурсан бөгөөд шинжээчид үнийн таамгаа бууруулжээ.
Газрын тосны зах зээлийн шинжээч Вандана Хари Ормузын хоолой аажмаар нээгдэж байгаа ч усан тээврийн хөдөлгөөн тогтворгүй, урьдчилан таамаглахад хүндрэлтэй хэвээр байгааг онцолсон байна.
