Улаанбаатар хотын гол нэрийн бараа, бүтээгдэхүүний үнэ зургаадугаар сарын 29-ний байдлаар өмнөх долоо хоногтой харьцуулахад дунджаар 0.3 хувиар буурсан бол өмнөх сарын мөн үеэс 3.2 хувиар өссөн үзүүлэлттэй байна.

Долоо хоногийн үнийн өөрчлөлтөөс харахад хүнсний ногооны үнэ бага зэрэг нэмэгдсэн бол харин махны үнэ буурсан байна. Тухайлбал, төмсний үнэ 1.3 хувь, луувангийн үнэ мөн 1.3 хувиар өсжээ. Харин хонины ястай махны үнэ 0.5 хувь, үхрийн цул махны үнэ 0.1 хувиар буурсан нь нийт үнийн индекс буурахад тодорхой хэмжээгээр нөлөөлсөн байна.

Зургаадугаар сарын 29-ний өдрийн байдлаар өргөн хэрэглээний зарим барааны дундаж үнэ дараах байдалтай байна. Үүнд, нэгдүгээр зэргийн гурил нэг килограмм нь 2521 төгрөг, цагаан будаа 5000 төгрөг, 600 граммын талх 2925 төгрөг, хонины ястай мах нэг килограмм нь 27,706 төгрөг, үхрийн цул мах 38,585 төгрөг, сүү нэг литр нь 5059 төгрөг, өндөг нэг ширхэг нь 616 төгрөгийн үнэтэй байна.

Хүнсний ногооны хувьд төмс нэг килограмм нь 3712 төгрөг, лууван 3436 төгрөг, сонгино 4612 төгрөгийн үнээр худалдаалагдаж байна.

Шатахууны үнийн тухайд АИ-92 автобензин нэг литр нь 2590 төгрөг, дизель түлш нэг литр нь 4335 төгрөгийн үнэтэй байна.

Ерөнхийдөө долоо хоногийн хугацаанд хүнсний гол нэрийн бүтээгдэхүүний үнэ тогтвортой хадгалагдсан ч улирлын нөлөөгөөр зарим хүнсний ногооны үнэ өсөх хандлага ажиглагдаж байна. Харин сарын дүнгээр авч үзвэл өргөн хэрэглээний бараа, бүтээгдэхүүний үнэ өссөн хэвээр байгаа нь өрхийн хэрэглээний зардалд тодорхой хэмжээгээр нөлөөлсөөр байгаа юм.