Украины дронууд Оросын агаарын довтолгооноос хамгаалах системийг нэвтлэн пүрэв гарагт Москва хотын зүүн өмнөд хэсэгт байрлах газрын тос боловсруулах үйлдвэрт цохилт өгсөн нь сүүлийн гурав хоногийн доторх хоёр дахь халдлага болов. Үүний улмаас гал гарч, өтгөн хар утаа тэнгэрт суунагласан байна.

Эдгээр халдлага нь Оросын дайны санхүүжилтийн гол эх үүсвэр болох газрын тосны салбарыг саармагжуулах Украины өргөн хүрээтэй кампанит ажлын нэг хэсэг юм. Гэхдээ Кремлээс ердөө 16 км-ийн зайд, Москвагийн тойрог замын дотор байрлах стратегийн чухал дэд бүтцэд бараг саадгүй цохилт өгснөөрөө Украин зөвхөн эдийн засгийн бус, улс төрийн мессежийг жирийн орос иргэдэд хүргэхийг зорьж байна.

Украины Гадаад хэргийн сайд Андрий Сибиха X сүлжээнд:

“Өнөө өглөө Москвагийн оршин суугчдын хамгийн их асууж буй асуултын нэг нь ‘Юу болоод байна вэ?’ гэсэн асуулт байна. Би хариулъя. Танай улс манай улсын эсрэг түрэмгийллийн дайн эхлүүлсэн. Олон жилийн турш манай ард түмнийг хөнөөсөөр ирсэн. Одоо юу болж байгааг ойлгосон бол Путинаас энэ дайныг хэзээ дуусгахаар төлөвлөж байгааг нь асуугаарай” хэмээн бичжээ.

Киевийн зүгээс Оросын гүнд хийж буй цохилтууд нь дайны нөхцөл байдлыг өөрсдийн талд эргүүлж буйн нотолгоо гэж үзэж байгаа бөгөөд Украины Ерөнхийлөгч Володимир Зеленский энэ байр сууриа энэ долоо хоногт Францад болсон Их долоогийн бүлгийн дээд хэмжээний уулзалтын үеэр АНУ-ын Ерөнхийлөгч Дональд Трамп болон бусад удирдагчдад танилцуулсан байна.