Украины дронууд Оросын агаарын довтолгооноос хамгаалах системийг нэвтлэн, өчигдөр буюу пүрэв гарагт Москва хотын зүүн өмнөд хэсэгт байрлах газрын тос боловсруулах үйлдвэрт цохилт өгч, дэлбэлсэн. Үүнтэй холбоотойгоор Монгол Улсад шатахууны хомсдол үүсэх эрсдэл байгаа эсэх талаар Аж үйлдвэр, эрдэс баялгийн сайд Г.Дамдиннямаас тодрууллаа.

Тэрээр "Ангарскийн үйлдвэрт дэлбэрэлт болсон гэх мэдээлэл одоогоор бидэнд ирээгүй байна. Манай улс шатахууны нийт хэрэглээнийхээ 97 хувийг ОХУ-аас авдаг. Одоогийн байдлаар бид өөрсдийн эзэмшиж байгаа агуулах, савны багтаамжийн хэмжээнд хангалттай хэмжээний шатахууны нөөц бүрдүүлсэн учраас иргэд сандарч, тэвдэх шаардлагагүй.

Гэхдээ Ормузын хоолойтой холбоотой дэлхийн зах зээлийн нөхцөл байдал мөн манай хойд хөршийн дайны үеийн нөхцөлөөс шалтгаалан шатахууны нийлүүлэлтийг тогтвортой хадгалах нь хүнд болж байна. Гэсэн ч олон жилийн хамтын ажиллагаа, найрсаг хөршийн харилцааны үр дүнд ОХУ манай улсад шатахууныг тасралтгүй нийлүүлж ирсэн.

Дизель түлшний хувьд дөрөвдүгээр сард нөхцөл байдал хүндрэлтэй байсан. Харин одоо бид ОХУ-ын дотоодын үнээр дизель түлшээ авч байгаа бөгөөд нийлүүлэлт тогтворжсон. АИ-92 шатахууны хувьд ч ОХУ-ын дотоодын үнээс хоёр дахин хямд үнээр авч байна. Гэхдээ ойрын хугацаанд үнийн асуудал яригдаж магадгүй байгаа. Яг одоо бид ОХУ-ын талтай холбоо барьж, нөхцөл байдлыг тодруулж байна. Бид 2028 он гэхэд гурван сарын хэрэглээгээ хангах хэмжээний нөөц бүрдүүлэх савтай болно" гэв.