Урин дулаан цаг ирж иргэдийн гол, усны ойролцоо зорчих хөдөлгөөн нэмэгдэж байгаатай холбогдуулан Нийслэлийн Онцгой байдлын газраас өнөөдөр хэвлэлийн хурал зохион байгуулж, болзошгүй осол, эрсдэлээс урьдчилан сэргийлэх чиглэлээр авч хэрэгжүүлж буй арга хэмжээний талаар мэдээлэл өглөө. Нийслэлийн хэмжээнд сүүлийн таван жилд гол, усны ослын улмаас 105 иргэн амиа алдсаны 80 нь насанд хүрэгчид, 22 нь хүүхэд байна. Осолд өртсөн иргэдийн дийлэнх нь архи, согтууруулах ундаа хэрэглэсэн үедээ усанд орсон бол хүүхдүүдийн хувьд эцэг эхийн хараа хяналт сул байснаас осолд өртсөн байна. Иймээс иргэдийг аюулгүй байдлаа хангаж, хүүхдүүддээ тавих хараа хяналтаа сайжруулан, мэргэжлийн байгууллагын зөвлөмжийг мөрдөхийг анхааруулсан юм.

Нийслэлийн ОБГ-ын Дэд дарга бөгөөд Ажиллагааны удирдлагын хэлтсийн дарга, Дэд хурандаа Э.Батбаяр: Дулааны улиралд өдөрт дунджаар голын эргээр 5000 орчим иргэн амарч, зугаалдаг бөгөөд 2500 орчим автомашин төвлөрдөг байна. Иймээс иргэдийн аюулгүй байдлыг хангах зорилгоор завьт эргүүлийн үйл ажиллагааг 2014 оноос хойш тасралтгүй хэрэгжүүлж, энэ жил 12 дахь жилдээ зохион байгуулж байна. Энэ удаагийн завьт эргүүл зургаадугаар сарын 15-наас есдүгээр сарын 15-ныг хүртэл ажиллана.

Завьт эргүүл ажилласнаар жил бүр гол, усны осолтой холбоотой дуудлагын тоог дунджаар 35-40 хувиар бууруулж, иргэдэд учрах хохирлыг 15 орчим хувиар багасгаж байна. Мөн сүүлийн таван жилийн судалгаагаар эргүүл, хяналт шалгалтын ажлыг оновчтой зохион байгуулсны үр дүнд гол усны осолд өртөгсдийн тоо хоёр дахин буурсан үзүүлэлт гарсан.

Баянзүрх дүүргийн Хар усан тохойгоос Сонгинохайрхан дүүргийн Хадан хясаа хүртэлх 50 км урт маршрутад осол эрсдэл өндөртэй 28 хар цэг бүртгэгдсэн байдаг. Эдгээр байршилд камерын хяналт тавьж байгаа ч хүрэлцээ хангалтгүй тул өргөтгөсөн бүрэлдэхүүнтэйгээр ажиллаж байна. Эрсдэлтэй цэгүүдийг судалж, зам тээврийн хөдөлгөөнд саад учруулж буй хэсгүүдэд ажиллаж байна. Судалгаагаар төвийн зургаан дүүргийн 63 хорооны 105 байршилд ус тогтдог нь тогтоогдсон. Түүнчлэн Баянзүрх, Хан-Уул, Сүхбаатар дүүрэг болон Тэрэлжийн гарам орчмын бүсэд нийт 1800 орчим айл өрх үерийн эрсдэлтэй бүсэд амьдарч байна. Үүнээс 143 иргэнийг аюулгүй бүс рүү нүүлгэн шилжүүлээд байгаа бөгөөд бусад айл өрхүүдэд шаардлага хүргүүлж, эрсдэлийг бууруулах чиглэлээр ажиллаж байна.

О.Оюунчимэг: Олон жилийн дунджаас дулаан байх бөгөөд түр зуурын аадар бороо олон орно

ЦУОШГ-ын урьдчилан сэргийлэх газрын ахлах мэргэжилтэн О.Оюунчимэг: 7-8 сард Улаанбаатар хотод агаарын температурын хувьд олон жилийн дунджаас дулаан байна. Хур тунадасны хувьд олон жилийн дундаж орчим байна. Агаарын температурын хувьд олон жилийн дунджаас дулаан байна гэдэг нь түр зуурын аадар бороо орох нөхцөл байгаа учраас юм. Тиймээс ард иргэд үер ус, аянга цахилгаан, нөөлөг салхины аюулаас сэргэмжтэй байхыг анхааруулж байна.