Төв аймгийн Заамар суманд 3 настай охин уурхайн цооногт унаж нас барсан харамсалтай хэрэгтэй холбоотойгоор холбогдох газрууд уул уурхайн компаниудад хяналт шалгалт хийж байна. Монгол Улсын Шадар сайд Н.Номтойбаяр уг шалгалтын ажил болон бусад цаг үеийн асуудлаар мэдээлэл хийлээ.

Тэрээр “Энэ осол хяналтын тогтолцоо алдагдсантай холбоотой. Одоо яригдаж буй Редбулкан компани ч биш. Дандаа бие биенээ хуурч хуурамч бичиг баримт үйлдэн үйл ажиллагаа эрхэлдэг. Одоогоор Заамар суманд уул уурхайн үйл ажиллагаа явуулж байгаа 13 компанид шалгалт хийгээд байна. Холбогдох газрууд хамтран эцэг эхээс нь зөвшөөрөл авсны дагуу "Хотулун гүнж" нэртэй хянан шалгах ажиллагааг эхлүүлж байна. Хууль эрх зүйн орчин нь хянаж шалгахад хязгаарлагдмал ч одоо байгаад нь нийцүүлж салбар салбарын уялдааг хангаж шалгалт хийхээс өөр аргагүй. Энэ нь хүний мууг үзэх гээд байгаа зүйл огт биш. Иргэдийн аюулгүй байдлыг хангах үүрэгтэй төр ажлаа хийж байна.

Аливаа осол аюулаас урьдчилан сэргийлэхийн тулд стандарт шаардлагыг мөрдүүлж, тогтмол төлөвлөгөөт хяналт хийх хэрэгтэй. Энэ тогтолцоо алдагдсан байна. Төр иргэний хяналтын тухай хууль болон Стандартын тухай хуулиар үүнийг сэргээнэ.

Онцгой байдлын салбарт техник тоног төхөөрөмж үнэхээр дутагдалтай байна. Өнөөдрийн байдлаар хангалт 41.6 хувьтай байна. Ийм байгаа нь хэд хэдэн шалтгаантай. Онц байдалтай тэмцэх чиг үүрэг бүхий байгууллагууд санхүүгийн хувьд бие даасан байх ёстой ч одоо бол 100 хувь улсын төсвөөс хамааралтай. Гамшгаас хамгаалах тухай хуульд хэд хэдэн асуудлыг шинэчлэн оруулж, эрх зүйн орчныг бүрдүүлнэ. Ойрын хугацаанд 5.5 их наяд төгрөгийн хөрөнгө оруулалтыг хийнэ. Бид техник технологийг ашиглаж, шаардлагатай тоног төхөөрөмжийг худалдаж авах цаг нь болсон. Засгийн газрын хуралдаан дээр Ерөнхий сайд улс орны санхүү хүнд байгаа ч онцгой байдлын салбарт тоног төхөөрөмж авъя гэж хэлсэн. Ирэх жилийн төсөв цалин, тэтгэвэр, тэтгэмж тавих төсөв болж байна. Хөрөнгө оруулалтын орон зай хумигдмал болсон. Төсөвт дарамт учруулахгүйгээр төр хувийн хэвшлийн түншлэлээр  энэ асуудлыг хэрэгжүүлэх бүрэн боломжтой.

Хариуцлагыг ярьж байж цаашид алдаа дутагдал гарахгүй. Хяналт шалгалтын ажил үргэлжилж байна. Ний нуугүй хэлэхэд үүний цаана системчлэгдсэн авлигал байна. Ашиг сонирхлын зөрчилтэй олон нөхөд хариуцлагатай өндөр албан тушаал дээр байна. Ийм нөхдүүд  ажлын хэсэгт орвол хуулиар хүлээсэн үүрэг гүйцэтгэх боломжгүй. Тэр хүмүүсийг халж солих асуудлыг холбогдох газруудад тавина. Ийм ноцтой харамсалтай асуудал болсоор байхад нүдээ аньж чихээ таглаж асуудлаас зугтааж болохгүй. Бие биенээ хуурч явах тусам хэтдээ болох аваар ослоос урьдчилан сэргийлж чадахгүй” гэлээ.