Сэлэнгэ аймгийн Шаамар сумын Цагдаагийн хэсэгт энэ сарын 19-20-нд шилжих шөнө иргэд хоорондоо маргалдаж, буун дуу гарсан гэх дуудлага, мэдээлэл бүртгэгджээ. Дуудлагын дагуу цагдаагийн алба хаагчид тухайн газарт очиж, хойшлуулшгүй ажиллагаа явуулсан байна.

ЦЕГ-ын Дотоод хяналт, аюулгүй байдлын газрын дарга, цагдаагийн хурандаа Н.Мишигдорж: Сэлэнгэ аймгийн Шаамар суманд иргэд хоорондоо маргалдаж, улмаар буун дуу гарсан гэх дуудлага мэдээлэл ирсэн. Тухайн гал нээсэн гэх иргэн нь Сүхбаатар дүүргийн Цагдаагийн газрын нэр бүхий алба хаагч байсан. Одоогоор албаны шалгалт явуулж байгаа бөгөөд цагдаагийн алба хаагчийн буруутай үйлдэл тогтоогдвол Цагдаагийн албаны тухай хуулийн 81 дүгээр зүйлийн 81.4-т заасны дагуу гаргасан зөрчлийн шинж чанарт тохирсон сахилгын арга хэмжээ авна.

Нэр бүхий албан хаагч ажлын бус цагаар, амралтын өдөр Сэлэнгэ аймагт зорчиж явахдаа иргэнтэй маргалдсан бөгөөд тухайн үед ангийн зориулалттай буугаар хий буудсан нь тогтоогджээ. Мөн ашигласан галт зэвсэг нь цагдаагийн байгууллагын албаны галт зэвсэг биш бөгөөд хамт зорчиж явсан “А” гэх иргэний ангийн зориулалттай буу байсан байна.