Монгол язгуур урлагийг орчин үеийн рок хөгжимтэй хослуулан, дэлхий дахинаа “Хүннү рок” урсгалыг тунхаглан таниулж буй “The Hu” хамтлаг 10 жилийнхээ ойд зориулан энэ сарын 8-ны өдөр “WOLF TOTEM | World Premiere” тоглолтоо Төв цэнгэлдэх хүрээлэнд зохион байгуулахаар өнгөрсөн бямба гарагт хэвлэлийн бага хурал хийлээ.

ХААН Банк тус тоглолтын стратегийн түншээр хамтран ажиллаж буй бөгөөд үндэсний өв соёлоо хамгаалах, сурталчлах, соёл урлагийг дэмжих зорилгоор “The Hu” хамтлагтай баяр наадмын өмнөхөн хамтын ажиллагааны санамж бичигт гарын үсэг зурж, тус хамтралын эхлэл болгон “Аавын мөр” хэмээх сайхан уран бүтээлийг нь дэмжин үзэгч, сонсогчдын хүртээл болгосонбилээ.

“The Hu” хамтлагийн хувьд энэ жилийн дэлхийг тойрох аялан тоглолтын албан ёсны эхлэл нь “WOLF TOTEM” тоглолт юм. Энэ бол зөвхөн 10 жилийн ойн тоглолт биш, дэлхийд Монголын нэрийг дуурсгасан хамтлагийн дараагийн арван жилийн эхлэлийг зарлаж, Монголын хөгжмийн ертөнцөд шинэ хуудсыг нээх түүхэн үйл явдал байх болно” гэдгийг уран бүтээлчид хэвлэлийн бага хурлын үеэр онцолсон. 2016 онд Улаанбаатар хотод байгуулагдсан тус хамтлаг Монголын уламжлалт хөгжим, морин хуур, төмөр хуур, хөөмий, хархирааг орчин үеийн рок хөгжимтэй хослуулан “Хүннү Рок” хэмээх цоо шинэ урсгалыг бий болгож, Монголын соёл, түүх, өв уламжлалыг дэлхийн хөгжмийн тавцанд таниулаад буй билээ.