Бразил улсын хөлбөмбөгийн шигшээ баг дэлхийн хөлбөмбөгийн ноён оргил болох Дэлхийн аварга шалгаруулах тэмцээн зохион байгуулагдсан цагаас нь хойш тасралтгүй оролцож буй цорын ганц баг юм.
Хөлбөмбөгийн ДАШТ нь дэлхийн хамгийн их үзэгчтэй, хамгийн өргөн цар хүрээтэй спортын тэмцээнүүдийн нэг бөгөөд улс орнуудын нэр хүнд, хүч чадлыг илтгэдэг томоохон индэр билээ. Анх 1930 онд зохион байгуулагдсан цагаасаа эхлэн энэ тэмцээн дэлхийн спортын түүхэнд онцгой байр суурь эзэлсээр ирсэн. Харин энэ бүх хугацаанд нэг ч удаа өнжөөгүй, тогтмол оролцсон баг бол Бразилын шигшээ юм.
Бразилын шигшээ багийн энэ амжилт нь зүгээр нэг статистик биш. Энэ нь тогтвортой хөгжил, залгамж халаа, авьяас чадварын тасралтгүй урсгалыг илтгэдэг үзүүлэлт юм. Өөрөөр хэлбэл, үе үеийн тамирчид нь өндөр түвшинд бэлтгэгдэж, дэлхийн талбай дээр өрсөлдөх чадвараа хадгалж чаддагийг харуулж байна. Бразил улс ДАШТ-ий түүхэнд таван удаа аваргын цом хүртсэн амжилтаараа дэлхийд тэргүүлдэг. Тэдний анхны аварга 1958 онд тохиож, залуу од Пеле дэлхий дахины анхаарлыг татаж байлаа. Тэрээр тухайн үед ердөө 17 настай байсан ч багийнхаа амжилтад асар их хувь нэмэр оруулж, хөлбөмбөгийн түүхэнд нэрээ мөнхөлсөн юм.
Бразил улс дараагийн дэлхийн аварга буюу 1962 онд дахин аваргалж, 1970 онд гурав дахь удаагаа түрүүлснээр Бразилын “алтан үе” бүрэн утгаараа тодорсон гэж үздэг. Олон шинжээчийн үзэж байгаагаар, 1970 оны баг нь бүх цаг үеийн хамгийн шилдэг шигшээ багуудын нэг юм. Тэдний тоглолтын хурд, уран дамжуулалт, багийн ойлголцол нь өнөөдрийг хүртэл жишиг хэвээр байна.
1994 онд Бразил дахин аваргын тавцанд гарч, хамгаалалт болон тактикийн хувьд илүү төгс тоглолтыг үзүүлсэн. Харин 2002 онд Азид болсон ДАШТ-д тэд тав дахь удаагаа аваргалж, дэлхийн дээд амжилтыг шинэчилсэн. Тэр үеийн багт Роналдо, Роналдиньо, Ривалдо зэрэг одууд гялалзаж байсан юм.
Бразилын хөлбөмбөгийг онцгой болгодог зүйл нь зөвхөн амжилт биш, харин тоглолтын хэв маяг юм. “Самба хөлбөмбөг” хэмээн нэрлэгддэг тэдний стиль нь уран техник, чөлөөт сэтгэлгээ, довтолгооны эрч хүчээрээ ялгардаг. Энэ нь дэлхийн сая сая хөгжөөн дэмжигчдийн сэтгэлийг татаж, хөлбөмбөгийг илүү урлагийн түвшинд хүргэсэн гэж хэлж болно. Мөн Бразил улс авьяаслаг тоглогчдыг тасралтгүй бэлтгэдгээрээ алдартай. Гудамжны хөлбөмбөгөөс эхлээд мэргэжлийн академи хүртэл олон шат дамжлагаар дамжин шинэ одууд төрдөг. Неймар бол орчин үеийн энэ урсгалын тод жишээ бөгөөд дэлхийн топ тоглогчдын нэгт зүй ёсоор тооцогддог.
Бразилын шигшээ баг сүүлийн жилүүдэд шүүмжлэлд өртөх болсон. Ялангуяа 2014 онд эх орондоо зохион байгуулсан ДАШТ-д Германд хүнд ялагдал хүлээсэн нь хөгжөөн дэмжигчдэд том цохилт болсон. Гэсэн ч энэ ялагдал нь багийг шинэчлэх, илүү хүчирхэг болох боломж болгосон гэж үздэг. Өнөөдөр Бразилын шигшээ баг дахин дэлхийн аваргын цомын төлөө өрсөлдөх зорилготойгоор шинэ үеийн тоглогчдыг бүрдүүлж байна. Тэдний зорилго бол зургаа дахь цомоо хүртэж, өөрсдийн рекордыг ахиулах явдал юм.
Ийнхүү Бразил улс ДАШТ-д нэг ч удаа өнжөөгүй, хамгийн олон удаа аваргалсан баг гэдгээрээ хөлбөмбөгийн түүхэнд онцгой байр суурь эзэлсээр байна. Энэ амжилт нь зөвхөн нэг улсын бахархал биш, харин дэлхийн спортын түүх билээ.
Бразилын хөлбөмбөгийн түүх маш баян учраас шилдэг хөлбөмбөгчдийг нэрлэхэд маргаан дагуулдаг ч дараах зургаан тоглогчид ихэнх шинжээчийн энэхүү саналд тогтмол багтдаг.
XX зууны хөлбөмбөгийн түүхэн дэх хамгийн агуу хөлбөмбөгчин Эдсон Арантис ду Насимэнту буюу Пеле 1958, 1962, 1970 онуудад гурван удаа дэлхийн аварга болж, дөрвөн аварга шалгаруулах тэмцээнд оролцсон тамирчин. Тэрээр ердөө 17 настайдаа Дэлхийн аварга шалгаруулах тэмцээн-д түрүүлж, дэлхий дахинд танигдсан юм. 1958 оны дэлхийн аварга шалгаруулах тэмцээний шилдэг залуу тоглогч, 1970 оны дэлхийн аварга шалгаруулах тэмцээний шилдэг тоглогч, 1973 онд Латин Америкийн шилдэг тоглогч болж байсан. Түүний гурван удаагийн дэлхийн аварга болсон нь өнөөг хүртэл эвдэгдээгүй амжилт юм.Пеле зөвхөн гоолын тоогоороо бус, тоглолтыг унших чадвар, багийн тоглолтод үзүүлэх нөлөө, лидер чанараараа онцгой байв. Түүний карьерын турш 1000 гаруй гоол оруулсан гэх статистик бий. Бразилын хөлбөмбөгийг дэлхийд таниулж, “самба стиль”-ийг бэлгэдсэн гол хүн нь яах аргагүй Пеле юм.
“Феномен” хочит Роналдо нь орчин үеийн довтлогчдын стандартыг өөрчилсөн тоглогч. Түүний хурд, биеийн хүч, төгсгөлийн чадвар хосолсон тоглолт нь хамгаалагчдад бараг зогсоох аргагүй байсан. Тэрээр 1998 болон 2002 оны ДАШТ-д Бразилын шигшээг финалд хүргэж, 2002 онд найман гоол оруулан багийг аварга болгосон. Роналдо карьерынхаа туршид олон хүнд гэмтэл авсан ч эргэн ирж чадсан нь түүнийг илүү агуу болгосон. Тэрбээр “Ballon d’Or” шагналыг 2 удаа хүртсэн бөгөөд дэлхийн шилдэг довтлогчдын нэг гэдгээрээ хүлээн зөвшөөрөгдсөн.
Гарринча бол байгалиас заяасан авьяас гэж юу байдгийг харуулсан тоглогч. Түүний дриблинг, хууралт, хурд нь хамгаалагчдыг төөрөгдүүлж, хөгжөөн дэмжигчдийг гайхшруулдаг байв. Ялангуяа 1962 оны ДАШТ-д Пеле гэмтсэн үед багийг бараг ганцаараа чирж аварга болгосон нь түүхэн амжилт юм. Түүний биеийн онцлог хэвийн бус байсан нь харин ч түүний хөдөлгөөнийг таамаглах аргагүй болгож, өрсөлдөгчдөд маш хэцүү байдал үүсгэдэг байжээ.
Роналдиньо бол хөлбөмбөгийг урлагийн түвшинд хүргэсэн тоглогчдын нэг. Түүний тоглолтод чөлөөт сэтгэлгээ, гайхалтай техник, инээмсэглэл хосолдог байв. 2002 оны ДАШТ-д Бразилын шигшээ багтайгаа аварга болж, дараа нь дэлхийн шилдэг тоглогчийн шагнал “Ballon d’Or”-ыг хүртсэн. Түүний “no-look pass”, чөлөөт цохилтууд, дриблингүүд нь өнөөг хүртэл хөлбөмбөгийн шилдэг мөчүүдийн тоонд багтдаг.
Зико бол 1980-аад оны Бразилын шигшээ багийн тархи, плеймейкер байсан. Түүнийг “Цагаан Пеле” гэж нэрлэдэг нь түүний ур чадвар, нөлөөг илтгэнэ. Тэрбээр чөлөөт цохилт, холын зайнаас гоол оруулах чадвар, тоглолтыг удирдах ухаанаараа алдартай. Хэдийгээр ДАШТ-д аварга болж чадаагүй ч түүний тоглолтын түвшин, клуб болон шигшээ багт үзүүлсэн нөлөө нь түүнийг Бразилын шилдэг тоглогчдын нэг болгожээ.
Неймар да Силва Сантош Жуниор нь 1992 оны хоёрдугаар сарын 5-нд Бразилын Сан-Пауло хотод мэндэлсэн. Багаасаа гудамжны болон клубийн бэлтгэлд тоглож эхэлсэн тэрээр 11 настайдаа Бразилын алдарт "Santos FC" клубт элссэн бөгөөд хурд, техник ур чадвараараа багийнхан болон дасгалжуулагчдын анхаарлыг татсан. 2009 онд мэргэжлийн хөлбөмбөгт дебют хийж, богино хугацаанд шилдэг залуу тоглогч болсон. 2011 онд Европ руу шилжиж, Барселона багт ирснээр дэлхийн тавцанд илүү их танигдсан. 2015–2017 онд Ла Лига, UEFA Champions League зэрэг томоохон цомыг багтайгаа хүртсэн. Шигшээ багт Наймар анх 2010 онд дэвшин орж, 2014 оны ДАШТ-д Бразилын гол найдвар болсон ч гэмтлийн улмаас хэсэг хугацаанд тоглох боломжгүй болсон. Гэсэн ч тэрбээр 2016 оны Олимпийн наадмын аварга болж, Бразилын багт анхны алтан медаль авчирсан нь түүний амжилтын оргилын нэг юм. Наймарын тоглолтод хурд, гөлгөр дриблинг, хурц өнцгөөс гоол оруулах чадвар нь онцлогтой. Тэрбээр 2022 оны ДАШТ-д багийнхаа гол найдвар болон довтолгооны төв болсон бөгөөд дэлхийн хэмжээний өрсөлдөгчидтэй харьцаж, өндөр түвшний тоглолт үзүүлсэн.
Эдгээр тоглогчид Бразилын хөлбөмбөгийг үе үеэр нь тодорхойлж, Дэлхийн аварга шалгаруулах тэмцээн болон дэлхийн тавцанд ноёрхоход гол үүрэг гүйцэтгэсэн. Тэдний нийтлэг чанар бол ур чадвар, бүтээлч тоглолт, мөн багтаа үзүүлсэн нөлөө юм. 2000-аад оны дунд үеэс эхлэн Бразилын шигшээ баг шинэ үе рүү шилжиж эхэлсэн. Кака, Тиаго Силва, Дани Алвес зэрэг тоглогчид багийн гол хүч болж, олон улсын тавцанд өндөр түвшинд өрсөлдсөөр байв.
Сүүлийн жилүүдэд Бразилын багийн нүүр царай нь Неймар болж, түүний эргэн тойронд шинэ үеийн тоглогчид бүрэлдэн тоглож байна. Винисиус Жуниор, Родриго, Каземиро нар багийн ирээдүйг тодорхойлж, дэлхийн аваргын дараагийн цомын төлөө өрсөлдөх зорилготой байна.
