УИХ-ын дараагийн даргаа нэр дэвшүүлчихвэл Н.Учрал Ерөнхий сайд Засгийн газраа байгуулж, төрийн гацаа арилна гэж хүлээж байсан олон нийтийн хүлээлт талаар боллоо.

Учир нь, УИХ дахь МАН-ын бүлэг 30:38-аараа хуваагдаж 30 талынхан буюу Д.Амарбаясгалан, Л.Оюун-Эрдэнэ талынхан УИХ-ын дараагийн даргад С.Амарсайханыг зүтгүүлээд олонх тал нь дэмжихгүй, С.Бямбацогтыг нэр дэвшүүллээ. Үүнээс болж УИХ дахь бүлгийн хагарал хурцдаж, бүлгийн хурал дээрээ цөөнх болсон талынхан уйлж, уурлаж байр суурь илэрхийлээд ч тусыг эс олж, олонхын саналаар С.Бямбацогтыг нэр дэвшүүлсэн.

Бүлгийн хурал нэлээд ширүүхэн болсон бөгөөд бүлгийн цөөнх талынхан "эв нэгдлээ хангая гэж байгаа бол УИХ-ын даргын томилгоог хүч түрж хийж болохгүй, хэрвээ хүч түрвэл Засгийн газарт орохгүй" гэсэн байр суурь илэрхийлсэн. Бүлгийн хуралд намын дарга Н.Учрал орж "УИХ-ын даргад нэр дэвшигч С.Бямбацогт Ерөнхийлөгчийн сонгуульд нэр дэвшихгүй, улстөржихгүй, гишүүд ялгаварлахгүй гэсэн гурван амлалт өгсөн" хэмээн хэлжээ.

Ингээд намын тал нь шахуу дэмжээгүй, УИХ-ын даргад нэр дэвшигчээ УИХ-ын нэгдсэн чуулганаар сонгох асуудлыг хэлэлцэж эхэлсэн ч УИХ дахь АН-ын бүлэг нэг хоногийн завсарлага аваад байна. Нэг үгээр хэлбэл, УИХ-ын даргын томилгооноос болж МАН-ын хагарал савнаасаа хальж, төрийг дахин гацаанд оруулав. АН-ын бүлгийнхэн УИХ-ын дарга намын гишүүнчлэлээсээ татгалздаг байх хуулийн төсөл санаачилсан бөгөөд тус хуулийг эрх баригч намынхан дэмжвэл УИХ-ын даргад С.Бямбацогтыг дэмжээд явна гэсэн байр суурь илэрхийлжээ. Тэгвэл УИХ-ын даргад нэр дэвшигч С.Бямбацогт намын гишүүнчлэлээсээ татгалзахад бэлэн гэдэг байр суурь илэрхийсэн.