Монголд "Төрийн өндөр албан тушаалтны зэрэг зиндаа, түүнтэй адилтгах төрийн албан тушаалтны зэрэглэлийг тогтоох тухай" УИХ-ын тогтоол гэж бий. Тус тогтоолоор төрийн өндөр албан тушаалтнуудын зэрэг зиндааг тогтоож өгдөг. Тус тогтоолд туссан төрийн өндөр албан тушаалтнуудаас Үндсэн хуулийн цэцийн гишүүд хуулиар ямар эрх ямба эдэлдгийг сонирхуулъя.

Цэцийн дарга УИХ-ын дэд дарга, Шадар сайдтай зэрэг зиндаа ижил гэж тус тогтоолд заажээ. Харин Цэцийн гишүүд нь УИХ-ын гишүүн, Засгийн газрын гишүүдтэй ижил зэрэг, зиндаатай. Тэгвэл Үндсэн хуулийн цэцийн тухай хуулиар Цэцийн гишүүд УИХ-ын гишүүдээс ч илүү хуулиар хамгаалагдсан хүмүүс. Цэцийн гишүүн гэмт хэрэг үйлдсэнийг шүүхээр тогтоохоос бусад тохиолдолд шалгах, нэгжлэг хийх, эгүүлэн татах хууль эрх зүйн орчингүй байгаа. Мөн Цэцийн гишүүнийг зургаан жилийн хугацаатай томилж, дараагийн хүнийг томилтол бүрэн эрхээ хэрэгжүүлнэ гэж заасан. Тиймээс бүрэн эрхийнх нь хугацаа дууссан ч дараагийн хүнийг томилтол хэдэн ч жил Цэцийн гишүүнээр ажиллаж болно гэсэн үг. Яг энэ заалтын дагуу Үндсэн хуулийн Цэцийн дарга Г.Баясгалангийн бүрэн эрхийн хугацаа өнгөрсөн оны зургадугаар сард дууссан ч дараагийн хүнийг нь томилоогүй учраас бүрэн эрхээ өнөөдрийг хүртэл хэрэгжүүлж байна.

Мөн Үндсэн хуулийн цэцийн тухай хуульд зааснаар Цэцийн гишүүнийг гэм буруутайг шүүх тогтоохоос бусад тохиолдолд баривчлах, албадан саатуулах, эрүүгийн хариуцлагад татах, эсхүл шүүхийн журмаар Зөрчлийн тухай хуульд заасан хариуцлага оногдуулах, орон байр, албан тасалгаа, биед нь үзлэг, нэгжлэг хийх, бичиг баримт, эд зүйлийг хураан авахыг хориглосон байна. Мөн өөрийнх нь хүсэлт, хуульд заасан хугацаа дуусахаас бусад тохиолдолд эгүүлэн татах боломжгүй байхаар хуульд заасан.