Стратегийн ач холбогдолтой ордуудын төрийн эзэмшлийн хувь хэмжээг тогтоох хэлэлцээр хийх Засгийн газрын бүрэн эрхт төлөөлөгч Ж.Батзанданг ажлаас нь чөлөөлсөн. Тэрээр өнөөдөр Ерөнхий сайдтай уулзаж ажлаа хүлээлгэн өгч байгаа бөгөөд өнгөрсөн хугацаанд хийсэн ажлынхаа талаар мэдээлэл өглөө.

Тэрээр, "Би Засгийн газрын БЭТ-өөр томилогдоод 9 сар ажиллаа. Энэ хугацаанд улс төр тогтворгүй, гурван удаа Засгийн газрыг огцруулах үйл явдал болсон. Засгийн газрын дэргэд хоёр ажлын хэсэг байгуулж, БЭТ ажлын хэсэгт гишүүнээр ажилласан. Монгол Улсын хэмжээнд 16 стратегийн орд байгаа. Оруулж болох 38 орд байгаа. Хувийн хэвшилд шилжсэн 11 ордыг 26 аж ахуйн нэгж эзэмшиж байна. Энэ аж ахуйн нэгжүүдтэй хэлэлцээр хийх ажлыг өнгөрсөн хугацаанд хийсэн. Орд бүхэн дээр саналын хувилбаруудыг боловсруулж Засгийн газарт хүргүүлсэн. Энэ саналуудыг Засгийн газар хэлэлцэж баталгаажуулах ёстой. Засгийн газрын баталсны дагуу УИХ эцэслэн батлах ёстой. Гэтэл сүүлийн 9 сар УИХ гурван удаа Засгийн газрыг огцруулах л асуудал ярилаа. Ажил ярьсангүй. Улс төрийн халаа элгээ л ярилаа.

Өнөөдөр Засгийн газар БЭТ-ийг дараагийн БЭТ-ээр солих шийдвэр гаргах юм шиг байна. Ерөнхий сайд уулзахаар дуудсан. Улс төрийн нөхцөл байдал өөрчлөгдсөнтэй холбогдуулж, бүрэн эрхт төлөөлөгч өөрчлөгдөх нөхцөл үүссэн байж болзошгүй юм шиг байна. Хэлэлцээрт идэвхтэй оролцсон компаниудад талархал илэрхийлье. Үүсмэл ордууд эзэмшиж байгаа компаниуд хэлэлцээрт идэвхтэй оролцсон. Төрийн хувь хэмжээг нэмэгдүүлэх чиглэлд хэлэлцээр үргэлжилж байгаа" гэлээ.