Хүйтний эрч чангарахтай зэрэгцэн томуу, томуу төст өвчний тархалт нэмэгдэж, эмнэлгүүдийн ачаалал эрс өсөж байна. Монгол Улс одоогоор томуугийн улирлын идэвхжилийн түвшинд шилжээд байгаа юм. Энэ удаагийн томуу хүүхдүүдийг олон хоногийн турш ядрааж, өндөр халуурах, гүйлгэх, суулгах, бөөлжих зэрэг шинж тэмдгээр хүчтэй илэрч байгаа аж.

Томуугийн дэгдэлт огцом өссөн энэ үед эмнэлгүүдийн нөхцөл байдал ямар байгааг сурвалжлахаар бид Чингэлтэй дүүргийн Нэгдсэн эмнэлгийн хүүхдийн тасгийг зорилоо. Тус эмнэлгийн 4, 5 дугаар давхарт байрлах хүүхдийн тасгаар ороход эмч, сувилагч нарын завгүй байдал шууд мэдрэгдэв. Ажлын өндөр ачааллаас шалтгаалан эмч нарын хэн нь ч яриа өгөх боломжгүй байгаагаа хэлсэн бөгөөд зарим нь жижүүрээсээ буугаад гэртээ харьж ч амжаагүй, хонож ажилласан талаар учирласан юм. Тасгийн нөхцөл байдал үнэхээр хүнд байв. Өрөө тасгуудад ор хүрэлцэхгүй болсон тул коридорт нэмэлт орнууд байрлуулжээ. Коридороор дүүрэн бяцхан хүүхдүүдээ тэврээд хэвтэхээс өөр аргагүйд хүрсэн хүүхдүүдээ сахиж буй ээжүүдийн дүр зураг угтлаа. Эмнэлэгт хэвтэн эмчлүүлж буй хүүхдүүд, тэдний эцэг эхчүүдтэй ярилцаж, газар дээрх нөхцөл байдлыг тодрууллаа.

Н.Навчаа: Хүүхдээ сахиад олон хонож байна. Эхэндээ ор олдож байсан ч одоо нөхцөл байдал огцом хүндрээд, коридор дүүрэн хүнтэй болсон. Энд хэвтэж байгаа бараг бүх хүүхэд томуугаар хүндэрч, хатгаатай ирсэн. Манай хүүхэд ч гэсэн 2–3 хоног хөнгөн ханиалгаж байгаад гэнэт хатгаагаар хүндэрсэн болохоор эмнэлэгт хэвтэхээс өөр аргагүй болсон. Одоо эмчилгээ хийлгээд арай дээрдэж байна.