Улсын их хурал дахь АН-ын бүлгийн дарга О.Цогтгэрэл намын дарга болсон ч бүлгийн даргынхаа ажлыг өгөхгүй гурван сар өнгөрч байна.

АН-ын бүлэгт бүлгийн дарга болох хүсэл, амбицтай гишүүн цөөнгүй байгаа ч О.Цогтгэрэл нам, бүлэг хоёроо хамтад нь "базсаар" байна. УИХ-ын гишүүн Б.Жаргалан, С.Эрдэнэболд нар бүлгийн даргад өрсөлдөхөө ил тод зарлаад байгаа. Мөн зарлаагүй ч бүлгийн дарга болох хүсэлтэй хүн олон бий. Тэгвэл УИХ дахь АН-ын бүлэг эрх баригч намынхан учраа олсны дараа бүлгийн шинэ даргаа сонгохоор ярьж байгаа аж. Учир нь эрх баригч намын улс төртэй зэрэгцэж АН-ынхан ч бужигнаад хэрэггүй гэсэн байр суурьтай гишүүд байгаа учраас бүлгийн даргын томилгоог хойшлуулж байгаа гэсэн мэдээлэл бий.

Гэхдээ нөгөө талдаа эрх баригч нам хоёр хуваагдсан энэ үед АН-ын бүлэг хайнаг хагалах буюу эцсийн шийдвэрт өндөр нөлөө үзүүлнэ. Тиймээс эрх баригч намын хуваагдалтай зэрэгцээд АН ч хуваагдах эрсдэлтэй учраас шинэ бүлгийн даргыг сонгохгүй байгаа аж.

Харин УИХ-ын гишүүн, АН-ын дарга О.Цогтгэрэл хэлэхдээ "Тодорхой хугацааны дараа би санал гаргаад бүлгийн даргыг сонгоод явна. Бүлгийн зарим гишүүн улс төрийн нөхцөл байдалтай холбоотойгоор бүлгийн даргын асуудлыг хойшлуулах санал гаргасан" гэсэн юм.