Японы эрдэмтэд хүний дутуу шүдийг сэргээн ургуулах шинэ төрлийн эмийн судалгааг эхлүүлсэн байна. Киотогийн Их Сургуулийн эмнэлэгт 2024 оны есдүгээр сараас энэхүү эмийн анхны клиник туршилтыг хүн дээр хийж эхэлсэн бөгөөд 30-64 насны эрэгтэйчүүд хамрагдаж байгаа талаар Nanoapps Medical мэдээлжээ.

Судалгааны багийг профессор Кацү Такахаши удирдаж байгаа бөгөөд тэд USAG-1 хэмээх уургийн үйл ажиллагааг дарангуйлснаар шүдний ургийг идэвхжүүлж, шинэ шүд ургуулах боломжтойг амьтны туршилтаар баталсан байна. Мууран дээр хийсэн туршилтаар амжилттайгаар шүд ургуулсан үр дүн гарчээ.

Одоогийн эхний шатны туршилтын гол зорилго нь эмийн аюулгүй байдлыг шалгах бөгөөд жинхэнэ үр нөлөө буюу шинэ шүд ургах эсэхийг дараагийн шатуудад тодорхойлох юм. Судалгааны багийн зүгээс хэрэв туршилтууд амжилттай болбол энэхүү эмийг 2030 оноос эмнэлгийн хэрэглээнд нэвтрүүлэх боломжтой гэж үзсэн байна.

Ийнхүү хүний шүдийг сэргээн ургуулах боломжтой эм бүтээх нь зөвхөн шүдний төрөлхийн гажигтай болон дутуу шүдтэй хүмүүст төдийгүй дэлхий дахины шүдний эрүүл мэндийн салбарт томоохон дэвшил болохоор байна. Гэхдээ судалгаа одоогоор анхан шатандаа яваа тул үр дүнг баталгаатай гэж үзэхэд эрт байгаа юм.