Цаг уур, орчны шинжилгээний газраас 2025-2026 оны өвөл, хаврын бэлчээрийн даацыг тооцон гаргажээ. Үүнд баг бүрийн бэлчээрийн ургац, малын тоо, бэлчээрийн талбайн хэмжээ болон ашиглах хугацаа зэрэг үзүүлэлтийг үндэслэсэн байна.

Шинжилгээний дүнгээр зуншлагын байдал наймдугаар сарын 20-ны байдлаар нийт нутгийн 54 хувь нь хэвийн, харин үлдсэн 46 хувь нь гандуу болон гантай гарсан байна. Энэ нь олон аймагт бэлчээрийн нөөц хомс байгааг илтгэж байгаа юм.

Бэлчээрийн даацын тооцоогоор нийт нутгийн зөвхөн 16.1 хувь нь бэлчээрийн илүүдэлтэй буюу нөөцтэй, 18.5 хувь нь хүрэлцээтэй байгаа бол үлдсэн хэсэгт нь бэлчээрийн даац хэтэрсэн дүн гарчээ. Тодруулбал, нийт нутгийн 30.7 хувьд бэлчээрийн даац 1-3 дахин, 16.3 хувьд 3-5 дахин, харин 18.4 хувьд олон дахин хэтэрсэн нь тогтоогдсон байна.

Өөрөөр хэлбэл ирэх өвөл, хаврын улиралд бэлчээрийн даац нийт нутгийн 35 хувьд л хүрэлцээтэй, харин 65 хувьд нь хэтэрсэн гэсэн дүн гарсан нь өмнөх жилтэй харьцуулахад 30 гаруй хувиар өссөн үзүүлэлт юм. Аймгийн түвшинд авч үзвэл Баян-Өлгий, Увс, Ховдын ихэнх нутаг болон Баянхонгор, Говь-Алтай, Дундговь, Дорноговь, Өмнөговь, Өвөрхангай аймгийн зарим сумдад бэлчээрийн даац олон дахин хэтэрсэн байна.

Зуны турш гандуу болон гантай байсан бүс нутгуудад өвс, ургамал хангалттай ургаагүйгээс бэлчээрийн чанар муудаж, мал тарга тэвээрэг авч чадаагүй байна. Иймээс эдгээр бүс нутаг өвөлжилт, хаваржилтад илүү хүндээр өртөх эрсдэлтэй гэж мэргэжлийн байгууллагууд анхааруулж байна.