Үндэсний их баяр наадмын бөхийн барилдаанд 4 болон түүнээс дээш давсан 32 бөхөөс, сур харвааны 16 тамирчнаас долоодугаар сарын 12-ны өдөр авсан допингийн шинжилгээний хариуг Хууль зүй, дотоод хэргийн яам болон Монголын допингийн эсрэг байгууллагаас танилцуулсан билээ.

Ингэхдээ үндэсний их баяр наадамд үзүүрлэсэн улсын гарьд Н.Өсөхбаяр болон Хэнтий аймгийн арслан Н.Баяржаргал нараас допинг илэрсэн. Мөн Завхан аймгийн Их-Уул сумын харьяат улсын гарьд Б.Гончигдамбын хариу эргэлзээтэй гарсан гэж мэдэгдсэн юм.

Мөн 18 аймаг, 3 дүүргийн  шөвгөрсөн 84 бөхийн допингийн шинжилгээ авснаас 9 бөх бүдэрснийг мэдэгдээд байгаа юм. Үүнээс зургаан бөхийн нэрийг ил болгосон байгаа. Тодруулбал, Хөвсгөл аймгийн заан Э.Мөнхтөр, аймгийн начин Б.Сүх-Эрдэнэ, Говьсүмбэр аймгийн начин О.Амгаланбямба, Төв аймгийн арслан Э.Чойням, аймгийн заан Э.Гантөмөр, Ховд аймгийн арслан Б.Базарсад зэрэг бөхчүүдээс илэрснийг зарласан. Үргэлжлүүлэн энэ долоо хоногт гурван бөхийн нэрийг зарлах аж. Харин гурван бөхийн шинжилгээний хариу ирээгүй, хүлээгдэж байгаа аж.

Тэгвэл допинг илэрсэн гэх бөхчүүдэд дүрмийн дагуу ямар шийтгэл оногдуулах вэ.

Допингийн эсрэг үндэсний дүрмийн арав дахь бүлэг нь бүхэлдээ хувь хүнд шийтгэл оногдуулах заалттай. Олон хүчин зүйлс, нөхцөл байдлаас шалтгаалан тухайн тамирчинд ямар шийтгэл оноох нь тодорхой болно. Хуучин шиг допинг хэрэглэсэн л бол хоёр хүртэлх жилээр, давтан хэрэглэсэн бол дөрөв хүртэлх жилээр барилдах эрхийг нь хасдаг үе өнгөрсөн. Үндэсний дүрэмтэй болсноор олон хүчин зүйлсийг бодолцож, барилдах эрхийг нь хасдаг болсон.