Татварын ерөнхий газраас энэ оны НӨАТ-ын хоёрдугаар улирлын буцаан олголт авах иргэдийг энэ сарын 8-ны 23:59 цагаас өмнө баримтуудаа бүртгүүлэхийг санууллаа. НӨАТ-ын буцаалтыг олгох журамд зааснаар:
Нэгдүгээр улирлын буцаан олголтыг дөрөвдүгээр сард,
Хоёрдугаар улирлын буцаан олголтыг долоодугаар сард,
Гуравдугаар улирлын буцаан олголтыг аравдугаар сард,
Дөрөвдүгээр улирлын буцаан олголтыг дараа оных нь нэгдүгээр сард олгох ёстой билээ.
Тэгвэл 2025 оны хоёрдугаар улирлын НӨАТ-аа долоодугаар сарын 8-ныг хүртэл бүртгүүлж, түүнээс хойш буцаан олголтоо авах аж.
Албан татвар төлөгчид буцаан олголтыг дараах нөхцөл, шаардлагыг бүрэн хангасан тохиолдолд олгоно. Үүнд:
Албан татвар суутган төлөгчөөс худалдан авсан байх;
Худалдан авалт татварын албанд бүртгэгдсэн байх;
Албан татвар ногдсон бараа, ажил, үйлчилгээ байх;
Бүртгэлийн хэрэгсэл буюу бүртгэлийн машинд бүртгэгдсэн байх зэрэг багтаж байна.
Энэ оны нэгдүгээр улирлын НӨАТ-ын буцаан олголтоор 1,242,062 иргэнд 81,6 тэрбум төгрөгийг шилжүүлсэн. Мөн 11,382 иргэн буцаан олголтоосоо 262.6 сая төгрөгийн татвар төлснийг Монголын татварын албанаас мэдээлсэн юм.
