Өнөөдрийн Засгийн газрын ээлжит хуралдаанаар Дарханы Төмөрлөгийн үйлдвэрийг түшиглэсэн гангийн үйлдвэр барьж байгуулах арга хэмжээний тухай тогтоолын төсөл баталсан байна. Түүнчлэн, Зөвшөөрлийн зөвлөлийг албан ёсоор хуралдуулж Зөвшөөрлийн хуулийг давсан хэм хэмжээ тогтоосон актууд, сайдуудын тушаалыг цуцал гэсэн чиглэл өгч байгаа талаараа ЗГХЭГ-ын дарга Н.Учрал танилцууллаа.

Тэрээр “Татварын хууль, Тендерийн хууль буюу төрийн болон орон нутгийн өмчийн хөрөнгөөр бараа, үйлчилгээ худалдаа авах хууль, Нийгмийн даатгалын хууль, Компанийн хууль, Дампуурлын хууль болон мөн зөвшөөрлийн хуулиуд гэсэн бизнест ээлтэй шийдвэр, санаачилгуудыг гаргах хүрээнд энэхүү эрх зүйн реформуудыг хийх ажлуудыг албан ёсоор эхлүүлж байна. УИХ-аас  2022 онд Зөвшөөрлийн хуулийг баталсан. Нийт 381 зөвшөөрлийг хуульчилж өгсөн. Үүнээс 251 тусгай зөвшөөрөл Зөвшөөрлийн хуулийг дагалдуулаад батлагдсан байдаг.  Түүнчлэн, 122 чиглэлийн зөвшөөрлийн актууд сайдын тушаалаар батлагдсан байдаг. Бид маргааш Зөвшөөрлийн зөвлөлийг албан ёсоор хуралдуулж зөвшөөрлийн хуулийг давсан хэм хэмжээ тогтоосон актууд, сайдуудын тушаалыг цуцал гэсэн чиглэл өгнө. Үүнээс болоод төрийн хүнд суртал бий болж байна. Үүнтэй холбоотойгоор даваа гараг бүр Ерөнхий сайдаар ахлуулах "Бизнест ээлтэй монгол" санаачилгын хүрээнд бизнес эрхлэгчдэд тулгарч буй асуудлыг Шуурхай штаб дээр зохион байгуулалттай хуралдаж, Засгийн газрын хуралдаанаар хэлэлцэнэ.

Засгийн газрын үйл ажиллагааны хөтөлбөрт тусгасан 14 мега төслөөс гурав нь хэрэгжиж эхэлсэн. Эдгээрийн долоон төсөл нь "Эрдэнэс Монгол" нэгдэлд хамаарч байгаа. Үүнд, нэмүү өртөг шингэсэн, технологийн агууламж шингэсэн бүтээгдэхүүнийг хэрхэн үйлдвэрлэх вэ гэсэн асуудлын хүрээнд Аж үйлдвэр, эрдэс баялгийн сайд Ц.Туваан сайд болон бид Шивээ-Овоогийн цахилгаан станц, Бор-Өндөрийн уулын баяжуулах үйлдвэр дээр ажилласан.