Цэс

​С.Бямбацогт: Хуулийг давхардалгүй, уялдаатай боловсруулах боломжтой болно

УИХ-ын чуулганы өнөөдрийн нэгдсэн хуралдаанаар “Монгол Улсын хууль тогтоомжийг 2020 он хүртэл боловсронгуй болгох үндсэн чиглэл” батлах тухай тогтоолын төслийн эцсийн хэлэлцүүлгийг хийж гишүүдийн 85.7 хувийн саналаар тус хуулийн төслийг баталлаа.

Энэ үеэр Хууль зүй, дотоод хэргийн сайд С.Бямбацогт “УИХ өмнө нь дөрвөн удаа хууль тогтоомжийг боловсронгуй болгох үндсэн чиглэл баталж, хэрэгжүүлж байсан ч өнгөрсөн дөрвөн жилийн хугацаанд буюу 2016 он хүртэл хууль тогтоомж боловсруулах талаар үндсэн чиглэл батлагдаагүй байна. Иймээс Монгол Улсын хууль тогтоомжийг 2020 он хүртэл боловсронгуй болгох үндсэн чиглэлийн төсөлд Улсын их хурлын гишүүд, Засгийн газрын гишүүд, холбогдох бусад байгууллага, нийт 43 байгууллагаас санал авч нэгтгэн боловсруулсан” гэдгийг онцолсон. Мөн тэрээр тус хууль батлагдсанаар Засгийн газраас 2016-2020 онд хэрэгжүүлэх үйл ажиллагааны хөтөлбөрт тусгасан зорилтыг биелүүлэх, хууль санаачлагчдаас санаачлах хууль тогтоомжийн төслүүд давхардалгүй, тодорхой цаг хугацаанд төлөвлөгдөн, өөр хоорондоо уялдаа холбоотой боловсруулагдах боломжтой болно гэдгийг хэллээ.

Хэлэлцүүлгийн үеэр гишүүд дараах асуултыг асууж, хариулт авсан.

УИХ-ын гишүүн Ц.Даваасүрэн: Гишүүдэд хууль санаачлах эрх нь хэвээр байх уу?

УИХ-ын гишүүн Н.Оюундарь: Монгол Улсын Ерөнхийлөгч, УИХ-ын гишүүд үндсэн чиглэлд тусгагдаагүй ч гэсэн шаардлагатай тохиолдолд хууль санаачлах бүрэн эрхтэй. Өөрөөр хэлбэл хууль санаачлах эрхтэй субъектууд хууль санаачлах бүрэн эрхтэй гэсэн үг.

УИХ-ын гишүүн О.Баасанхүү: Хот тосгоны эрхзүйн байдлын тухай хууль огт батлагддаггүй. Эрдэнэтийг хот болгоё гэсэн яасан бэ?

Ажлын хэсэг: Таны хуулийн төсөл санаачлах эрх хэвээр байгаа.

Ийнхүү хуулийн төслийг баталснаар УИХ-ын чуулганы үдээс өмнөх хуралдаан өндөрлөлөө. 
iToim.mn таалагдсан бол:

Нийтэлсэн огноо: 2017-01-12 12:44:24


Нийт сэтгэгдэл: (0)

АНХААРУУЛГА: Уншигчдын бичсэн сэтгэгдэлд itoim.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.

Баярлалаа. Таны сэтгэгдлийг хүлээн авлаа.

Танд санал болгох