• 2017 оны 09 сарын 24  
  • USD - 
  • CNY - 
  • RUB - 
Цэс

​Гурван сарын дараа 660 сая долларын өр төлөхөө мэдэж байгаа улстөрч байна уу

Амралт, зугаалгын үе дуусч, сургууль цэцэрлэг орох цаг айсуй. Ерөнхийлөгчийн сонгуулийн дараагаас л эзгүйрсэн яам, тамгын газрынхан ажилдаа орж, эрх баригчдын улс төр идэвхжиж байна. Харамсалтай нь, ихэнх нутаг гантай, сүүлийн үед бороо их орж байгаагаас ургац алдах, өвөлжилт хүндрэх бодит эрсдэл байгаа ч энэ бүхэнд анхаарал хандуулж, шийдвэр гаргаж байгаа юм алга.

Улс орны өмнө тулгамдсан асуудлыг шийдэх биш, улс төрийн эрх ашиг, албан тушаалын төлөө эрхбаригчид “алалцаж” байгааг л харах боллоо.

Улстөрчид талцан хэрэлдэж байх зуур улс орны өмнө олон хүндрэлүүд ар араасаа үүсч эхэллээ. Цаг агаарын нөхцөл байдлаас хамаарч тариаланчид ургац алдах, Монгол Улс дотоодын гурилын хэрэгцээгээ хангаж чадахгүй байх бодит эрсдэл үүсэх магадлалтай байна. Зуншлага сайтай баруун болон зүүн аймгуудад малын гоц халдварт шүлхий өвчин гарлаа.

Энэ бүгдийг эс тооцдог юмаа гэхэд Монгол Улс гурван сарын дараа дэлхийн санхүүгийн зах зээл дээр дампуурлаа зарлуулах эсэх дээрээ тулаад байна.

Манай улс таван жилийн өмнө олон улсын зах зээлээс босгосон Чингис бондынхоо эхний 500 сая ам.долларын эргэн төлөлтийг гурван сарын дараа барагдуулах ёстой. Тодруулбал, 2012 оны арванхоёрдугаар сард босгосон Чингис бондын 4.125 хувийн хүүтэй 500 сая ам.долларын эргэн төлөлтийг 2018 оны нэгдүгээр сарын 5-ны өдөр төлөх хуваарьтай. Мөн 2018 оны тавдугаар сард Дим Сан бонд буюу нэг тэрбум юанийн хүүд 160 сая ам.долларын төлбөр хийнэ. Өөрөөр хэлбэл, он гараад 660 сая ам.долларын өр төлбөрийг барагдуулна.

Засгийн газар эдгээр бондын эргэн төлөлт, хүүгийн төлбөрийг хийх санхүүгийн чадамжтай юу. Энд анхаарлаа хандуулж байгаа хүн байна уу. Бүгдээрээ сандал ширээ л яриад байх юм. Энэ Засгийн газар гарч ирэнгүүтээ Хөгжлийн банкны 580 сая ам.долларын өрийг төлөх үүрэг хүлээсэн. Мөнгөгүй учраас Хөгжлийн банкны өндөр хүүтэй зээлээ бага хүүтэй зээлээр солих өрийн менежмент хийж, дампуурлаа зарлуулахаас аврагдсан. Одоо дахин өрийг өрөөр дарж чадах уу.

Валютын сангийн хөтөлбөрийн хүрээнд хийх санхүүжилтийг зээл, бондын эргэх төлөлтөд зарцуулахгүй байх заалттай. Зээлийг хугацаанд нь төлж чадахгүй бол ямар асуудал үүсэх вэ. 2018 оны эхээр төлөх бондын эргэн төлөлтийг хийхдээ дахин бонд босгож өрийг өрөөр дарах аргыг хэрэглэхээс өөр арга байна уу. Гэтэл дотооддоо улс төрийн ийм бужигнаантай байхад олон улсын зах зээл дээрээс бага хүүтэй бонд босгож чадах уу, чадахгүй. Засгийн газрыг огцруулах санаархал, эрх баригч МАН-ын дотоод зодоон нь зах зээл дээр бонд босгоход сөргөөр нөлөөлнө. Улс төрийн тогтворгүй байдалтай гэж үзнэ.

Өмнө нь босгосон бондоос бага хүүтэй санхүүжилт татахын тулд манай улс хөрөнгө оруулалтын орчноо сайжруулж, бүх төвшинд тогтвортой байдлыг хангах ёстой. Хамгийн гол нь зээлжих зэрэглэлээ ахиулж л Засгийн газар бага хүүтэй бонд босгох боломжтой болно. Засгийн газрын зээлжих зэрэглэл ахихад улс төрийн тогтвортой байдал маш чухал.

Хэрвээ бондын төлбөрийг бонд босгох замаар шийдэхгүй бол дотоод эх үүсвэрээр, гаднын зээл тусламж хүсэхээс өөр гарцгүй болно.

Дотоодод нүүрс, зэсийн үнэ өсч, орлого төвлөрөлт сайн байгаа ч талаас илүү хувь нь цалин тэтгэвэртээ зарцуулагдана. Цаана нь үлдэх багахан орлого бондын эргэн төлөлтийн хаана ч хүрэхгүй нь мэдээж. Энэ эрсдэлийг мэдэж байгаа улстөрчид байна уу?

Бидний өмнө одоо Засгийн газраа огцруулна гэж гурван сарын турш дотроо бужигнах, гурван сарын дараа төлөх 500 сая ам.долларын өрөө яаж төлөх шийдлээ олох гэсэн хоёр сонголт байна. Засгийн газар огцорвол мэдээж шинэ Засгийн газар байгуулагдана. Энэ улстөрд байдаг л, монголчууд бидний хангалттай мэдэх процесс. Харин гурван сарын дараа хагас тэрбум ам.долларын өрөө төлж чадахгүй бол санхүүгийн дампуурлаа зарлуулах уу. Монгол Улс өрөө төлж чадахгүй байгааг олон улсын зах зээл дээр зарласны дараа гадаадын хөрөнгө оруулагчид бидэнд итгэх үү. Гадаадын хөрөнгө оруулалтгүйгээр зудтай өвлөө яаж давах вэ. Энэ бүгдэд хариулах чадвартай, бэлэн хариулттай нь хэн байна вэ.

Усгүй болох гэж байж алтаар яах вэ

Улсгүй болох гэж байж амиар яах вэ гэдэг үг байдаг даа. Үүн шиг санхүүгийн дампуурлаа зарлуулах гэж байж сайдын суудлаар яах гээд байдаг юм бол доо, энэ улстөрчид.

iToim.mn таалагдсан бол:

Нийтэлсэн огноо: 2017-08-17 11:50:14


Нийт сэтгэгдэл: (5)

АНХААРУУЛГА: Уншигчдын бичсэн сэтгэгдэлд itoim.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү. Хэм хэмжээ зөрчсөн сэтгэгдлийг админ устгах эрхтэй.

Баярлалаа. Таны сэтгэгдлийг хүлээн авлаа.

  1. хишгээ (202.9.43.57) 2017-08-19 18:30:02
    ОУВС гэж мангас биш өөр айлгах сэдэв алга уу
  2. зочин (27.123.214.122) 2017-08-18 08:58:25
    Эрхбиш дээдчуул мэдэж байгаа байлгуй Харин МАН удирдах бурэлдуунээ,дотоод ажлаа л цэгцэлж авах хэрэгтэй дээ Элдэв хэл ам,хов живший асуудлаа хурдан шийдээд цаашдын ажилдаа шуудрах л чухал байна.
  3. Зочин (202.9.43.186) 2017-08-17 13:06:17
    Эрх биш Төр гэж байгаа болохоор мэдэж л баигаа даа Сэтгүүлчид сануулах нь зөв ч битгий эвэр амлаад баицгаа Өрииг өрөөр төлж л таараа ямар сураагүи юм биш
  4. Зочин (27.123.212.137) 2017-08-17 12:44:50
    одоо өрийг өрөөр дарахгүй шүү
    1. Зочин (202.9.40.16) 2017-08-18 06:34:48
      ЯГ ҮНЭН ШҮҮ ДЭЭ!!!

Танд санал болгох