УИХ-ын чуулганаар Коронавируст халдвар /КОВИД-19/-ын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуульд нэмэлт, өөрчлөлт оруулах тухай хуулийн төслийн хэлэлцэх эсэхийг хэлэлцэж байна. Хэлэлцэж байгаа асуудалтай холбогдуулан гишүүд асуулт асууж, хариулт авч байна.
УИХ-ын гишүүн Ц.Даваасүрэн: Ковидын хууль Үндсэн хууль зөрчиж байгаа. Үндсэн хуулиа зөрчиж болохгүй. Тиймээс онц байдлаа зарлаад яв. Үгүй бол Гамшгийн хуулиараа зохицуулаад яв. Хүний хөдөлмөрлөх, орлого олох эрхийг хэзээ ч зөрчиж болохгүй. Төсөв санхүү үнэхээр замбараагүй болж байна. Ирээдүй өв санд долоо их наяд байх ёстой байсан. Гэтэл гурван их наяд байна. Үүнийг 2030 он болтол зарцуулахгүй байх хуультай. Одоо сангийн хөрөнгнө рүү орох гэж байна. Ковидын хууль чинь маш их эмх замбараагүй байдлыг бий болгож байна.
УИХ-ын гишүүн Ж.Сүхбаатар: Монгол Улсын олон иргэн ковидын халдварын улмаас нас барсан байна. УИХ хүндэтгэл үзүүлэхгүй юм уу. Бусад улс орны Засгийн газар, парламентын хуралдаанаар хүндэтгэл үзүүлж байна. Манай Их хурал ч босоод хүндэтгэл үзүүлчихмээр байна.
Сая над руу иргэнээс мессэж ирж байна. “Иргэд өвдөөд эмээ авч чадахгүй хэцүү байна. Өнөөдөр гэхэд Чингэлтэй дүүргийн эмнэлэг эмгүй гэж байна. Хэнд хандах вэ. Ард түмэнд хэрэгтэй, оновчтой арга хэмжээ авч өгөөч гэж байна.
Энэ хуулийн хугацааг дэмжихгүй. Энэ Үндсэн хуулийн асуудал болчихлоо. УИХ хэвийн горимд ажиллаж чадахгүй бүтэн жил болж байна. Хоёр минутад дуржигнуулах гээд байна. Ард түмний амыг бид барьж байна. УИХ нь амаа таглуулсан байгаа. Засгийн газрын стратеги менежмент бүтэлгүйтчихсэн. Солонгос 50 сая хүнтэй одоо 200 хүрэхгүй тохиолдол гараад явж байна. Засгийн газар ажлаа зохион байгуулж чадахгүй байгааг бид хэлэх цаг болсон. Та нар нүдтэй, харж байгаа юм байгаа биз дээ. Аравдугаар сарын 1 гэхэд хэвийн горимд шилжих ёстой. Хугацааг танилцуулж байж хуулийг оруулж ирэх ёстой. Энэ хуулийн үйлчлэлийг УИХ сунгах боломжгүй. Засгийн газар шинэ хууль оруулж ир.
Шадар сайд С.Амарсайхан: Манай зарим гишүүн амьдралд ойр юм ярьсан дээр. Цар тахалтай дэлхий нийтээрээ тэмцэж байна. Хэзээ хэн хэвийн нөхцөлд оруулах нь тодорхойгүй байна. Манай эрүүл мэндийн салбар ямар түвшинд хөгжсөн бэ гэдгээ өөрсдөө харах хэрэгтэй. Засгийн газар иргэдийн амь нас, эрүүл мэндийг хамгаалахын төлөө явж байна. Гэтэл хүний эрхийг зөрчиж, хууль зөрчиж байна гэж ярьж болохгүй. Хэрвээ энэ хуулийг сунгаж өгөхгүй бол иргэдийнхээ амь насыг хамгаалахгүй гэж байгаатай ялгаагүй.
Эрүүл мэндийн сайд С.Энхболд: Эрүүл мэндийн салбарын зүгээс маш олон ажлын хэсэг гаргасан. Өрхийн эмнэлгийн тусламж үйлчилгээ өрхийн тарифаар ажиллаж байна. 70 мянга байсныг 160 мянган болгон өөрчилж байна. Өрхийн эрүүл мэндийн төвийн эмч, ажилчдын цалин урамшуулал гээд бүх зүйлийг оруулж тооцсон. Энэ бол цар тахал гэдгийг эрхэм гишүүд ойлгох хэрэгтэй. Зарим улсад гуравдугаар давлагаа эхэлж байна. Манай улсад ч нөхцөл байдал хүнд байна. Урд өдөр нь амьсгалын дутагдлаар эмнэлэгт ирээд маргаа нь хоёр уушги нь битүү хатгаа болж байна.
УИХ-ын гишүүн Д.Өнөрболор: Вакцинжуулалтын үр дүн яагаад гарахгүй байгаа юм бэ. Дархлаажуулалтын эрсдэл, судалгаа, нөхөн олговрыг тогтоох шаардлагатай байна. Дэлхийн улс орнууд вакцин үйлдвэрлэгч нартай гэрээ хийхдээ энэ асуудлыг яриад явж байгаа.
Гадаад харилцааны яамны Төрийн бичгийн дарга Ц.Анхбаяр: Худалдагч талуудтай байгуулсан гэрээнд хариуцлагаас чөлөөлөгдсөн гэрээ давхар байгуулсан. Үүнийг бид дотооддоо ярьж шийдвэрлэх ёстой болохоос худалдагч талуудтай ярих асуудал биш.
УИХ-ын чуулган үргэлжилж байна.
