Зөв мэдээлэл олж, төлөвлөгөөтэй бэлдэж, тэнцэж чадвал мөнгөөр биш хүсэл зорилгоороо гадаадын шилдэг их дээд сургуулиудад сурах боломж нээлттэй байдаг. Гадаадад суралцахыг зорьж буй залуустаа зориулж одоо зарлагдсан байгаа болон удахгүй зарлагдах тэтгэлгүүдийн талаархи мэдээллийг хүргэж байна.
Их Британи Умард Ирландын Нэгдсэн Вант Улсын Засгийн газраас олгодог тэтгэлэг
“British Chevening Scholarships” жилд дунджаар 1500 гаруй оюутанд олгодог энэхүү тэтгэлэгийн хэмжээ 30,000 фунт стерлинг. Английн аль нэг их сургуульд шалгалт өгч тэнцсэн тохиолдолд сургалтын төлбөр, сар болгоны стипенд, дотуур байр, анх очоод төвхнөхөд зориулсан зардал, онгоцны тийзний зардал, визаны төлбөрт тэтгэлэг олгодог. Их Британийн засгийн газрын Chevening тэтгэлэг наймдугаар сарын 8-наас албан ёсоор өргөдөл хүлээн авч эхлэх юм байна. Ихэвчлэн магистрын нэг жилийн хөтөлбөрт олгоно. Өргөдөл анкет бичиг баримтыг наймдугаар сарын 6-наас хүлээж авч эхэлнэ.
Тэтгэлгийн тухай дэлгэрэнгүй мэдээллийг эндээс авна уу. Германы Засгийн газрын магистрын тэтгэлэг /DAAD/
Германы Засгийн газраас магистрын сургалтанд 50 болон 100 хувийн тэтгэлэг олгодог. Хамгийн гол нь герман хэлний A2-B1 төвшний англи хэлний IELTS 6.5, IBT TOEFL 80 оноотой байх шаардлагатай. Түүнчлэн ажлын газрын тодорхойлолт, буцаж ирэх баталгаа, суралцах төлөвлөгөө, CV, зорилгоо тодорхойлсон захиа, хамтран ажиллагсдын таныг тодорхойлсон захиа, дипломны хуулбар шаардлагатай. Ямар программ сонгосноос шалтгаалж тэтгэлгийн өргөдөл авах хугацаа өөр байдаг. Тэтгэлгийн өргөдөл анкет бичиг баримтыг ихэвчлэн жил бүрийн наймдугаар сараас хүлээж авч эхэлдэг.
Тэтгэлгийн тухай дэлгэрэнгүй мэдээллийг эндээс авна уу. БНСУ-ын Засгийн газрын тэтгэлэг
“Korean Government Scholarships” БНСУ-д дээд боловсрол эзэмших хүсэлтэй гадаад оюутнуудад олгодог боломжит хөтөлбөр бөгөөд үүгээрээ дэлхийн удирдагчдыг олшруулах, дэлхийн хэмжээнд Солонгосын нөхөрсөг хамтын ажиллагааг өргөжүүлэх зорилготой юм. Тэтгэлэгт сургалтын бүрэн зардал, ном сурах бичгийн зардал, эрүүл мэнд аялалын даатгал гэх зэрэг зардлуудыг багтаасан байдаг. Тэтгэлгийн өргөдөл анкет бичиг баримтыг 2018 оны аравдугаар сараас арваннэгдүгээр сар хүртэл хүлээж авна.
Тэтгэлгийн тухай дэлгэрэнгүй мэдээллийг эндээс авна уу. Чехийн Засгийн газрын тэтгэлэг
Бүгд Найрамдах Чех Улсын Засгийн газар нь хөгжиж буй орны иргэдийг БНЧУ-ын дээд боловсролын байгууллагуудад суралцахад нь дэмжлэг үзүүлэх үүднээс гадаадын хөгжлийн туслалцааныхаа хүрээнд тэтгэлэг олгодог. Суралцуулахаар санал болгож буй мэргэжлийн чиглэл нь геологи, эрчим хүчний инженерчлэл, экологи, мал эмнэлэг ба ойн аж ахуй. 2019-2020 оны хичээлийн жилийн тэтгэлгийн өргөдөл, баримт бичгийг 2018 оны есдүгээр сарын 30 хүртэл хүлээж авна.
Тэтгэлгийн тухай дэлгэрэнгүй мэдээллийг эндээс авна уу. 
