"No War" хөдөлгөөнийхөн өнөөдөр ОХУ-аас Монгол Улсад суугаа Элчин сайдын яамны гадаа тайван жагсаал хийлээ. Жагсагчид Украины төрийн далбааны өнгийг илтгэсэн давуу барьж,  дайныг эсэргүүцэн, энх тайванг хүсэж үзэл бодлоо илэрхийлэв. Мөн ОХУ-ын Элчин сайдыг яаралтай Монгол Улсыг орхихыг иргэд шаардлаа. 

Тодруулбал, ОХУ-аас Монгол Улсад суугаа Онц бөгөөд бүрэн эрхт Элчин сайд И.К.Азизов дипломат ёсыг үл хүндэтгэн Монгол Улсын тусгаар тогтнол, эрх чөлөөнд халдаж байгаа үйлдлээ зогсоож, уулчлалт гуйхыг жагсаалд оролцогчид шаардав. Тусгаар Монгол Улсын иргэдийн эрх чөлөөнд бүдүүлгээр халдаж байгааг сануулж байв. Мөн Элчин сайдыг дипломат ёсыг эрхэмлэн яаралтай Монгол Улсыг орхин огцрохыг шаардсан юм. Монгол Улсын иргэд ОХУ-ын ард түмэнтэй дайсан биш, харин Элчин сайдын дээрэнгүй үйлдлийг эсэргүүцэн жагсаж байгааг тодотгож байлаа. 

Жагсагчид хэлэхдээ "ОХУ-ын Элчин сайд И.К.Азизовыг улсын дотоод асуудалд оролцож байгааг хэрхэвч зөвшөөрөхгүй. Монгол Улсын бие даасан тусгаар байдалд ингэж түрэмгийлэн хандаж болохгүй. Тиймээс үзэл бодлоо чөлөөтэй илэрхийлэх Үндсэн хуулиар олгосон эрхээ Монгол Улсын иргэд эдэлж, Элчин сайд И.К.Азизовыг Монгол Улсыг орхихыг шаардаж байна. Ноён Элчин сайд И.К.Азизов та дипломат ёсыг зөрчсөн нийтлэлээ буцааж, дипломат ёсыг эрхэмлэнэ үү" хэмээж байв. 

Эргэн сануулахад, гуравдугаар сарын 24-ны өдөр ОХУ-аас Монгол Улсад суугаа Элчин сайдын яамны албан ёсны пэйжид "Монголын Ардчилсан намын гишүүд болон АНУ-ын либерал ноёрхлыг дэмжигчдийн анхааралд" гэх мэдээллийг постолж, нийтэлсэн нь иргэдийн шүүмжлэл, дургүйцлийг хүргэсэн юм. Үүнтэй холбоотойгоор Монгол Улсын Гадаад харилцааны яамнаас эргүүцлийн ном бичгийг Оросын Элчин сайдад хүргүүлж, постоос Монгол Улстай хэсгийг устгахыг шаардсан ч одоог хүртэл ямар нэг арга хэмжээ аваагүй байна.