ОХУ-ын төрийн өмчит “Газпром” компани даваа гаригт Монгол Улсын нутаг дэвсгэрээр дамжин өнгөрөх “Союз Восток” байгалийн хийн хоолой барих төслийн урьдчилсан ТЭЗҮ-ийг баталсан талаар мэдээллээ. Уг төсөл нь зүүн Сибириэс БНХАУ руу байгалийн хий нийлүүлэх “Сибирийн хүч 2” хийн хоолойн төслийн үргэлжлэл гэдгийг "Газпром" компани мэдээлэлдээ онцолсон байна.
"Газпром"-ийн мэдээлэлд дурдсанаар "Сибирийн хүч-2" төсөл нь цаашдаа “Союз Восток” нэртэйгээр үргэлжлэх бөгөөд маршрут нь Монгол Улсын нутаг дэвсгэрээр дамжин өнгөрөх юм. "Сибирийн хүч-2" байгалийн хий дамжуулах хоолойн хүчин чадал нь өмнө төлөвлөж байснаас 1.3 дахин их хүчин чадалтай байхаар "Союк Восток" магистралийн ТЭЗҮ-ийг боловсруулсан байна.
Газпромын боловсруулсан “Союз Восток” төслийн ТЭЗҮ-д Монгол Улсын нутаг дэвсгэрээр дайран өнгөрөх хийн хоолойн оновчтой маршрут, дамжуулах хоолойн урт, голч, даралт, компрессорын станцын тоо болон төслийн нийт өртгийг тусгасан байна. Төлөвлөсний дагуу “Союз Восток” хийн магистрал хоолой барих төслийн хөрөнгө оруулалт, ашиглалтын зардлын нарийвчилсан задаргааг тусгасан ТЭЗҮ-ийг энэ оны эцэс гэхэд боловсруулж дуусах юм.
Монгол Улсын Засгийн газар 2019 оны арванхоёрдугаар сард ОХУ-ын төрийн өмчит “Газпром” компанитай байгалийн хий дамжуулах хоолой барих харилцан ойлголцлын санамж бичиг байгуулж, хамтарсан ажлын хэсэг байгуулсан. Улмаар 2021 оны гуравдугаар сарын 11-нд хамтарсан ажлын хэсгийн 2021–2022 оны үйл ажиллагааны төлөвлөгөөг баталсан. Мөн 2021 оны эхээр уг төслийн зураг төсөл, судалгааны ажил, техник эдийн засгийн үндэслэлийг боловсруулах зорилгоор “Газопровод Союз Восток” компанийг Монгол Улсад байгуулсан билээ.
