Нийслэлийн Баянзүрх дүүргийн 97 дугаар сургуулийн хоёрдугаар ангийн сурагч ангийн багшдаа зодуулсан хэмээн хүүхдийнхээ улайж, хавдсан гарны зургийг цахим орчинд нийтэлж, гавьяат багш ийм зохисгүй үйлдэл гаргаж болох уу гэх мэдээлэл нийгмийн сүлжээнд гарсан билээ.

Энэ асуудлаар сурагчаа зодсон гэх 97-р сургуулийн багш Л.Цэрэнбадамаас өөрөөс нь тодрууллаа. 

Тэрээр "Тухайн хүүхэд өглөө 07.00 цагт надтай зэрэгцэн ирдэг. Түүний дараагаар даалгавар шалгаж, шүлгийг нь уншуулж, хүрдийг нь цээжлүүлж 8.00 цаг хүртэл ажилладаг байсан. Өчигдрийн /3.15/ хувьд монгол хэлний хичээл 10.00 цагийн үед ороход муухай бичсэн учраас цохисон. Гэхдээ айхтар чанга биш. Хичээл тарах үед ээж нь биш эмээ нь ирж авсан.  Орой 22.05 минутын үед ээж нь залгаж "миний хүүхдийг та алгадсан байна" гэхээр нь "эмнэлэг орж шалгаж, үзүүлж эм тариа, эмчийн зөвлөгөө авъя" гэхэд тухайн хүүхдийн эцэг эх оройтсон тул маргааш шийдмээр байна гэсэн. Миний хувьд 30 гаруй жил боловсролын салбарт ажилласан ч хүүхдийг зураг нь дээр байгаа шиг цохиж, зодохгүй. Би өөрийгөө ч зодсон гэхгүй, өөр нэгнийг ч зодсон гэхгүй. Яагаад хүүхдийн гар тийм болсныг мэдэхгүй байна. Сая уулзахад тухайн хүүхдийн гарны хавдар, улайсан нь буурсан байна. Миний хувьд гар руу нь цохисондоо эцэг эхээс нь уучлалт гуйж, учраа олсон" хэмээв.

Уг асуудлаас болж эцэг эх нь хүүхдээ сургуулиас нь шилжүүлэхгүй, харин тухайн багшийн хувьд үл ойлголцлоос үүдэн хүүхдийг ялгаварлан гадуурхахгүй гэдэг байр сууриа илэрхийлсэн юм.

Харин уг асуудлаар 97-р сургуулийн нийгмийн ажилтан Н.Хашчулуунаас тодруулахад "Манай сургуулийн багш багшийн ёс зүйгүй үйлдэл гаргасанд эцэг, эхчүүдээс уучлал хүсье. Мэдээллийг бид өчигдөр орой авч өглөө сургуулийн захиргаа тус багшаас тайлбар мэдүүлэг авсан. Одоогоор эцэг эхтэй нь уулзахаар хүлээж байна. Энэ хэргийг яаралтай шийдэх болно. Шийдэхдээ Засгийн газрын 33-р тогтоол, 2018 оны БСШУЯ-аас баталсан ЕБС-ийн багш, ажилтны ёс зүйн тушаалаар шийдэгдэнэ.  Мөн сургуулийн ёс зүйн зөвлөл тухайн багшийн талаар хэлэлцэж сургуулийн захиргаанд танилцуулна. Сургуулийн захиргаа сануулгаас эхлэн халах хүртэл арга хэмжээг авна" гэв.