Монгол Улс дахь коронавирусийн нөхцөл байдлын мэдээг 2021.04.29-ний 11.00 цагийн байдлаар ЭМЯ-наас танилцууллаа. Мэдээллийн эхэнд Засгийн газар 2021 оны тавдугаар сарын эхэн гэхэд нийслэлийн 1.1 сая иргэн буюу 18-аас дээш насны хүн амын 60 хувийг дархлаажуулах зорилго тавин ажиллаж байна. Тиймээс "COVID-19"-ийн эсрэг вакцинд хамрагдаагүй иргэд дархлаажуулалтдаа идэвхтэй хамрагдахыг уриаллаа.

Улсын хэмжээнд сүүлийн 24 цагт 11145 хүнд шинжилгээ хийхэд 1015 сорьцод коронавирус илэрлээ. Ингэснээр нийт халдварын тоо 34623 тохиолдол болж байна. Шинээр илэрсэн тохиолдлуудын 1013 нь дотоодын халдвар байгаа бол эрүүл мэндийн нэг ажилтан болон зөөвөрлөгдөн орж ирсэн нэг тохиолдол тус тус бүртгэгджээ. Дотоодын халдварыг задалбал Улаанбаатарт 864, хөдөө орон нутагт 149 тохиолдол тус тус бүртгэгдсэн байна. Харин зөөвөрлөгдсөн нэг тохиолдол нь дөрөвдүгээр сарын 23-нд Казахстаны Алматы хотоос тусгай үүргийн нислэгээр ирж, тусгаарлагдаж байсан 97 зорчигчдын дундаас илэрсэн аж.

Сүүлийн хоногт 686 хүн эдгэрсэн бөгөөд эмнэлгээс 399, гэрийн ажиглалтаас 287 хүн гарсан байна. Ингэснээр өнөөдрийн байдлаар нийт эдгэрэлтийн тоо 18719 болжээ.

Харамсалтай нь сүүлийн 24 цагийн хугацаанд ТАВАН иргэн нас барж, улсын хэмжээнд нийтдээ 102 хүн коронавирусийн халдвараар нас бараад байна. Ийнхүү "COVID-19"-ийн нас баралт гурван оронтой тоонд шилжлээ. Нас барагсдын ар гэр, төрөл төрөгсдөд гүн эмгэнэл илэрхийлье.

Хөдөө орон нутагт сүүлийн 24 цагт 149 тохиолдол бүртгэгдсэн. Халдварын тоог задалбал:

-Ховд аймагт 3

-Завхан аймагт 2

-Говь-Алтай аймагт 33

-Булган аймагт 4

-Архангай аймагт 2

-Өвөрхангай аймагт 11

-Сэлэнгэ аймагт 4

-Дархан-Уул аймагт 39

-Орхон аймагт 13

-Төв аймагт 36

-Говьсүмбэр аймагт 1

-Дундговь аймагт 1 тохиолдол тус тус бүртгэгдсэн байна.

Улсын хэмжээнд өнөөдрийн байдлаар нийтдээ 4768 хүн эмнэлэгт хэвтэн эмчлэгдэж байгаагаас хөнгөн 2632, хүндэвтэр 1590, хүнд 437, маш хүнд 109 хүн байна. Харин гэрийн тусгаарлалтад 7629 хүн байгаагаас 3388 хүнийг эмнэлэгт шилжүүлэх, эсвэл гэрийн эмчилгээг үргэлжлүүлэх тандалт судалгааны ажил явагдаж байна гэж ЭМЯ-наас мэдээллээ.