Монгол Улсын Засгийн газар даваа гаригт Оюу толгой төслийн анх тооцсон зардал 1.45 тэрбум ам.доллараар хэтэрч, далд уурхайн бүтээн байгуулалтын ажил 22 сараар хойшилсон нь геотехникийн асуудлаас болоогүй гэх дүгнэлтийг хөндлөнгийн шинжээч байгууллага танилцуулсан талаар мэдээлсэн.

Тэгвэл Оюу толгойн 66 хувийг эзэмшигч Туркойз Хилл Ресурс компанид “The Independent Consulting Group”-ын зүгээс төслийн менежменттэй холбоотой зардал хэтэрч, бүтээн байгуулалт хойшилсон нь мөн геотехникийн асуудлаас төдийлөн шалтгаалаагүй гэх дүгнэлтийг хүргүүлсэн талаар мэдээллээ. Улмаар Туркойз Хилл Ресурс болон Оюу толгойн Төлөөлөн удирдах зөвлөл хөндлөнгийн шинжээчийн дүгнэлтийг нарийвчлан хянаж байгаа бөгөөд удахгүй дүгнэлттэй холбоотой асуудлуудаар тодорхой тайлбар өгнө гэж мэдэгджээ.

Харин Туркойз Хилл Ресурс компанийн 51 хувийг эзэмшигч Рио Тинто группын зүгээс хөндлөнгийн шинжээчийн дүгнэлтийг нарийвчлан судалсны эцэст Оюу толгойн Төлөөлөн удирдах зөвлөлтэй дээрх асуудлаар хамтран ажиллана гэж мэдэгдсэн байна.

Оюу толгой төслийн менежментийг хариуцагч Рио Тинто групп 2019 онд тооцоолоогүй геологийн хүндрэлээс шалтгаалж Оюутолгойн далд уурхайн бүтээн байгуулалтын зардал 1.2-1.9 тэрбум ам.доллараар хэтэрч, анхны олборлолт хийх хугацаа 30 хүртэлх сараас хойшлох нөхцөл үүссэн талаар мэдэгдсэн. Улмаар зардлын хэтрэлтийг хэрхэн санхүүжүүлэхтэй холбоотой асуудлаар хөрөнгө оруулагч талуудын дунд үл ойлголцол, зөрчилдөөн үүссэн. Ийнхүү талууд зөрчилдөөнийг гуравдагч этгээдийн оролцоотой шийдвэрлэх зорилгоор 2021 оны гуравдугаар сард олон улсын “The Independent Consulting Group”-ыг хөндлөнгийн шинжээчээр хөлсөлсөн юм.