Засгийн газрын ээлжит хуралдаанаас гарсан шийдвэрүүдийг танилцууллаа. Энэ үеэр Гадаад харилцааны сайд Б.Батцэцэг Украин дахь иргэдийн татан авалттай холбоотой мэдээллийг өглөө.
Тэрээр "Өнөөдрийн байдлаар эх орондоо буцах хүсэлт гаргасан иргэдийг бүгдийг татан авлаа. Сүүлийн буюу Харьковт байсан 15 оюутан яг энэ мөчид Польш улсын хилээр орж ирж байна. Нийт 58 иргэнийг Польшийн хилээр татаж авч, эх оронд нь буцааж авч ирэх ажиллагааг амжилттай зохион байгуулж байна. Энэ ажиллагаанд Польш улсад суугаа Элчин сайдын яам болон тэнд байгаа монгол иргэдийн төлөөлөл мөн Украин улсад суугаа Өргөмжит Консул нар ихээхэн үүрэг гүйцэтгэлээ. Польшийн хил нэвтэрсэн иргэдээс 18 нь Монгол Улс руу буцахаар ниссэн бөгөөд үүний гурав нь эх орондоо ирээд байна. Харин үлдсэн 15 иргэн Истанбулд байрлаж байна. Маргааш Монгол Улсдаа ирэх болно.
Ингээд бид хүсэлт гаргасан бүх иргэдээ авч ирлээ. Мөн Украинд өөрсдийн хүсэлтээр үлдсэн иргэдээс эх орондоо буцах тухай хүсэлт ирүүлээд байна. Одоогоор Киев хотод дахин гурван иргэн байна. Энэ иргэдээ татан авах болно.
-Манай улсын хувьд энэхүү дайн ямар эрсдэл дагуулна гэж бодож байна?
-Дайны талаарх таамаглал маш их байна. Бид голчлон эдийн засгийн эрсдэлээ тооцож, ярьж байна. Украинд үүсч байгаа нөхцөл байдалтай холбоотойгоор Засгийн газар дээр хаалттай горимоор Монгол Улсын эдийн засагт сөрөг нөлөө үзүүлэх зүйлсийг судалж, мэргэжлийн судалгааг хийж, авах арга хэмжээний талаар ярилцсан. Ингээд манай улс тодорхой бэлтгэлтэй, бэлэн байдалд байгаагаа шалгах, тодорхой арга хэмжээг төлөвлөх үүрэгтэй ажлын хэсэг байгууллаа. Энэ ажлын хэсгийг би ахалж байгаа. Энэ асуудлыг бид хаалттай горимоор хэлэлцсэн бөгөөд цааш ҮАБЗ-д танилцуулахаар шийдвэрлэсэн.
-Одоогоор хэдэн иргэн өөрсдийн хүсэлтээр үлдсэн байна вэ?
-Одоогоор 20 иргэн үлдсэн байна. Ихэвчлэн Украин иргэдтэй гэр бүл болсон эвсэл өндөр настай, эрүүл мэндийн хувьд явах бололцоогүй хүмүүс өөрсдийн хүсэлтээр үлдсэн.
-Манай улсын хувьд Украин ОХУ-ын нөхцөл байдалд ямар байр суурьтай байгаа вэ. Улс орон, улс төрийн хүчнүүд өөрсдийн байр сууриа илэрхийлсээр байгаа шүү дээ?
-Манай улсын байр суурь тодорхой. Бид Монгол Улсын Үндсэн хууль болон гадаад улсын үзэл баримтлалын дагуу байр сууриа илэрхийлсэн. Бид энхийг эрхэмлэсэн, нээлттэй, бие дасан олон тулгуурт гадаад бодлого явуулдаг. Энэ зарчмын хүрээнд бид сүүлийн үеийн үйл явдалд гүнээ сэтгэл зовниж, анхааралтай ажиглаж байна. Тус хурцадмал байдал даамжирвал Европ болон дэлхийн энх тайвны тогтвортой байдалд ноцтой нөлөөлж, таамаглашгүй үр дүнд хүргэх аюултай. Тийм учраас холбогдох талууд яриа хэлэлцээний замаар дипломат үйл ажиллагаа болон сайн санааны үндсэн дээр галыг даруй зогсоож, хурцадмал байдлыг намжаах нь чухал байна гэх байр суурьтай. Цаашид бид Үндэсний аюулгүй байдлын зөвлөлтэй зөвшилцөж, ойрын хугацаанд мэдэгдэл гаргах болно.
-Үүнтэй давхцаад байгалийн хийн хоолойн төсөл яригдаад байгаа. Энэ ямар учиртай юм бэ?
-Байгалийн хийн хоолойн төслийн асуудал бол шинэ зүйл биш. Энэ төслийг урьдчилаад шийдчихсэн. Энэ ажил Монгол Улсын Ерөнхийлөгчийн айлчлалын үеэр шийдвэр нь гарсан асуудал.
-Гадаад харилцааны яамнаас оюутнуудын татан авалттай холбоотой алдаа дутагдал гаргаж байгааг иргэд шүүмжилж байна. Энэ асуудалд ямар нэгэн хариуцлага тооцох болов уу?
-Бид нөхцөл байдлыг үнэлсний дараа тодорхой хариуцлагын асуудлыг ярих болно. Украинд манай Элчин сайд, Консулын газар байхгүй. Өргөмжит Консул харин өөрийн чадах хэмжээнд сайн ажилласан гэж бодож байна. Оюутнууд болон, иргэдийн гомдлыг нягталж үзээд арга хэмжээ авах болно.
