БНХАУ-ын нийслэл Бээжин хотын “Шувууны үүр” цэнгэлдэх хүрээлэнд болсон өвлийн олимпын наадмын нээлтэд дэлхийн 84 орны баг тамирчид оролцсон.
Тэгвэл АНУ-ын “NBC” телевиз болон Хонконгийн “South China Morning Post” сонин “Бээжин-2022” өвлийн олимпын наадмын нээлтийн ёслолд оролцсон хамгийн загварлаг хувцастай улс орнуудын нэгээр Монгол Улсын баг тамирчдыг нэрлэсэн байна.
Тухайлбал, АНУ-ын “NBC” телевиз “Emporio Armani”-гийн спорт хувцасны “EA7” брэндээр гоёсон Италийн баг тамирчдыг хамгийн загварлаг хувцастай шигшээ багаар тодруулжээ.
Италитай адил төрийн далбааны өнгөөрөө гоёсон Францын шигшээ багийн тамирчдын хувцсыг хоёрт эрэмбэлсэн байна.
Мөн төрийн далбаагаараа гангарсан Их Британийн баг тамирчид гуравт оржээ.
Харин “NBC” телевиз олимпын наадмын өмнө нэлээд хэл ам дагуулсан “Michel & Amazonka”-гийн урласан Монголын баг тамирчдын өвлийн олимпын наадмын ёслолын хувцсыг хамгийн загварлаг улс орнуудын жагсаалтад дөрөвт эрэмбэлсэн байна. Үндэсний дээл, малгайгаараа гоёсон манай баг тамирчдын хувцсыг Хонконгийн “South Morning China Post” сонин мөн хамгийн загварлаг хувцсаар нэрлэсэн юм.
Үүнээс гадна мөн үндэсний хувцас, билэгдлээрээ гангарсан Колумб, Шинэ Зеланд, Америкийн Самао, Мексик, Дани зэрэг орнуудыг олимпын нээлтийн ёслолын хамгийн загварлаг хувцастай баг тамирчдаар тодруулсан байна.
Тэгвэл АНУ-ын баг тамирчдын ёслолын хувцсыг “NBC” телевиз 10-р байрт эрэмбэлсэн байна.
