Эрүүл мэндийн яамнаас коронавирус буюу “Covid-19” өвчний нөхцөл байдлын талаар ээлжит мэдээллээ өглөө. Монгол Улсын нөхцөл байдлын мэдээллийг хүргэж байна.
-ЭМЯ-ны эмнэлгийн тусламжийн газрын дарга Я.Буянжаргал: Нэгдүгээр сарын 9-нөөс хойш 3325 хүнийг ажиглалтад авснаас өнөөдрийн байдлаар 2057 иргэн ажиглалт, тусгаарлалтад байна. Тусгаарлалт, ажиглалтад байгаа хүмүүст эмнэлгийн тусламж үйлчилгээг 297 эмч, эмнэлгийн мэргэжилтэн газар дээр нь үзүүлж ажиллаж байна.
Бид эмчилгээ оношилгоонд олон улсын судлаачдын хийсэн нотолгоонд тулгуурласан мэдээллийг ашиглаж, шинэчилж байна. Жишээ нь, эмчилгээнд захын судасны хүчилтөрөгчийн хангамжийг сайжруулах, хүчилтөрөгч эмчилгээ, хоёрдогч үрэвсэл халдвараас сэргийлсэн антибиотик эмчилгээ, дархлаа сэргээх, сийвэн сэлбэх эмчилгээ, мөн уламжлалтын эмчилгээ ялангуяа олон улсын хэвлэл мэдээлэл дээр Хятад зэрэг орнууд хунчир, чихэр өвс хэрэглэж байгаа тухай гарч байна. Бид энэ бүгдийг судлаж, эмчилгээндээ ашиглаж байна.
Мөн өвчтөний асаргааны зааврыг гаргаж, эмчилгээндээ ашиглаж байна. Эхээс урагт халдвар дамжина гэдэг нь судалгаагаар батлагдаагүй учраас халдвар авсан хөхүүл ээжүүд маскаа зүүгээд хүүхэддээ хөхөө хөхүүлэхийг ДЭМБ-аас зөвлөж байна. Диализ эмчилгээнд орж байгаа иргэд эмчилгээнийхээ дараа бөөгнөрч суух, хоол унд идэхийг хориглож байгаа. Эмийг эмчилгээний хувьд туршилтад явж байгаа эмүүдийг ашиглаж байна. Холбогдох эм эмнэлгийн хэрэгслүүдийг олон улсын судалгаанд үндэслэн нөөцөө бүрдүүлэн хэрэглэж байна.
-ХӨСҮТ-ийн ерөнхий захирал Д.Нямхүү: Гуравдугаар сарын 19-нд Стамбул-Улаанбаатар чиглэлийн онгоцоор ирсэн 22 хүний шинжилгээний хариу сөрөг буюу коронавирус илрээгүй. Үүнээс өмнө нь 24 хүнээс шинжилгээ авч, хариу нь сөрөг гарсан. Үргэлжлүүлэн 200 гаруй хүний шинжилгээг хийж байна.
Гуравдугаар сарын 22-нд Орхон аймагт тусгаарласан зургаан хүний шинжилгээний хариу сөрөг гарлаа. Өнөөдрийн байдлаар ХӨСҮТ-ийн хяналтад 289 хүн байна.
Гуравдугаар сарын 23-нд Алтанбулаг боомтоор орж ирсэн 3 сэжигтэй тохиолдлыг Сэлэнгэ аймагт тусгаарлан, сорьц нь Улаанбаатар руу ирж байна” гэлээ.
