Байр суурь: Даатгалын салбарыг төр өөр дээрээ авч нураах гэж байгааг эсэргүүцэж байна

УИХ-ын гишүүн Т.Аюурсайхан тэргүүтэй 20 гишүүн Жолоочийн даатгалын тухай хуулийн шинэчилсэн найруулгын төслийг УИХ-д өргөн мэдүүлсэн билээ. Уг хуулийн төслийг өчигдөр байнгын хороогоор хэлэлцэх эсэхийг нь дэмжсэн юм. Хуулийн төсөлд жолооч нарын төлдөг албан журмын даатгалын мөнгийг төрийн санд хуримтлуулдаг болох зохицуулалтыг хийхээр тусгасан нь даатгалын компаниудын эсэргүүцэлтэй нүүр тулаад байна. Хувийн хэвшил ямарч асуудалгүйгээр хийж ирсэн ажлыг заавал төр өөрөө хийх гэж байгаа нь даатгалын салбарыг дампууруулах эрсдэлтэй гэж үзэж байгаагаа илэрхийлсэн.

Харин хууль санаачлагчийн зүгээс жолооч нарын жил бүр төлдөг албан журмын даатгалын мөнгө эргээд жолооч нартаа хүрэхгүй байгаа учраас даатгалын санг төрд төвлөрүүлж, тэндээсээ жолооч бүрд хүрэх даатгалын үр шимийг нэмэгдүүлэх, хохирлыг зөв үнэлэх, жолоочид чирэгдэл учруулахгүйгээр хохирлыг шуурхай, бүрэн барагдуулдаг тогтолцоог бий болгох боломжтой болно гэж тайлбарлаж буй.

Монгол Улсын даатгалын салбарт олон жил ажиллаж байгаа туршлагатай компаниудын төлөөллөөс дээрх хуулийн төслийн талаарх байр суурийг тодруулснаа хүргэж байна. Даатгалын компаниуд төр хувийн хэвшлийн ажлыг булаах, цаашлаад хууль санаачлагчид ашиг сонирхлын зөрчил байна гэдгээ илэрхийлэв.

Мандал даатгал: УИХ-ын дэд дарга өөрөө лоббинд автсан байна